Latest News

Chanchin thar thenkhat

BOP sak mek enfiah a ni

Indo-Bangla ramri hrula Border Outpost sak mek chu hna viltu, Engineering Projects India Limited hotuten nimin khan an tlawh a. Ramri-a duty Border Security Force-te awmna tur, Border Outpost pakhat sak nan hian Ministry of Home Affairs sum cheng nuai 800-900 bawr vel sen a ni tlangpui a, Border Outpost thenkhat, a hun taka sak zawh te chu BSF-ten an luah tawh laiin, BOP thenkhat sak hna erawh a muan avangin a satute ban an lo nih phah tawh a ni. Ramri hrul-a BOP pakua sa tur hian contractor 3 dang rawih thar niin BOP 39 sak turah 21 chu BSF kutah hlan a ni tawh a, BOP sak zawh tawh dang 4 pawh BSF kutah hlan thuai tum a ni bawk.


Bonded Labour System sawiho

Nimin khan Khawzawl-ah Addl. DC, Lal-rohlua hovin District Vigilance Committee on Bonded Labour System chu an thukhawm a, he thutkhawm ah hian Member Secretary leh SDC, H. Lalramenga chuan Bonded Labour System (Abolition) Act, 1976 hnuaia Bonded Labour leh Bonded Labour System awmzia sawi-fiahin, Vigilance Committee mawhphurhna hrang hrangte a tarlang a. Hemi hnu hian member te’n hmalak dan tur an sawiho zui nghal a, hmalakna tur hrang hrang ngaihtuahin Line Department hrang hrang, VC leh NGO kaltlanga Bonded Labour System chungchanga mipui inzirtirna leh District chhunga zirchianna (survey) kalpui nise tih a ni.


YMA ten chenna In sak sak

Sawleng Chhim Veng Branch YMA chuan an huamchhunga mahni-a khawsa leh kum upa, Mangchhuana (83) chenna In tur hnatlang in an sak sak a, nimin-a hnatlang-ah hian mi 80 vel zet an thawkchhuak a ni. Mangchhuana In tur sakah hian mi inphal te leh mi tlawmngaiten thingzai leh perek bakah bungraw dang thawhin, bialtu MLA leh Minister, Lalchhandama Ralte chuan Inchung tur Rangva bandle 4 a tum sak a, a bang tur hi VC ten an tum sak thung a ni. In sak hnatlang hi Vawiin-ah chhunzawm a ni ang.


NABARD in vbc. 160 dah

National Bank for Agriculture and Rural Development (NABARD) hnuaiah Mizoram tan kum 2020-2021 chhungin cheng vbc. 160 hman tura dah a ni a, NABARD kaltlanga pawisa puk hi kumkhat ah za zela 2.7 chauh in a pung a ni. Mizoram in kumin Feb. ni 15 thlenga project 522 atana RIDF sum dah zat chu cheng vbc. 1406.35 niin, Mizoram-ah Project hrang hrang 37 ah NA-BARD kaltlanga loan pek mek a ni bawk.


Hremna lekkawh ve phut

MPCC Media Department chuan Feb. 19, 2021-a MNF Party ten Vanapa Hall-a AMC inthlan a an chak an lawmnaah Mizoram sawr-kar in punkawmna a zawm tur, Standard Operating Procedure (SOP) a siam bawhchhiaa Dan an palzut chu pawi an tih thu sawiin, SOP zawmlo chunga hremna lekkawh a nih ve ngei theihna tura hma la turin Mizoram sawrkar an phut thu an sawi bawk.


Football khelh tan a ni

Thenzawl Zone Football Association (TZ-FA) buatsaih kum bithliah nei-a Football inelna hrang hrang chu nimin khan Thenzawl-ah khelh tan a ni. Rawlthar leh naupang ten Football a hma an sawn theih nana TZFA in ‘RP Store Football Tournament’ tum hnihna an buatsaih hi Sports & Youth Services Department Joint Director, K. Lalhmangaihzuala chuan Thenzawl-ah a hawng a, TZFA President, Liantluanga Renthlei kaihhruai he hunah hian khuallian chuan infiammi te tan Football chu eizawnna tlak anih thu leh thalai, naupang sualna kawng zawh tur ven nana TZFA ten Tournament an buatsaih chu lawmawm a tih thu a sawi a. TZFA hnenah hian Football 4 leh Goal net Pair 2 a pe bawk.

Nimin-a tan tak RP Store Football Tournament-ah hian Thenzawl khawchhung bakah Zote South, Buangpui leh Neihloh atangin Team 21 an tel a, Under-16 ah Team 8, Under-13 ah Team 9 leh Under-10 ah Team 4 telin, thla thar March ni 4 khian Final khel-a zawhfel tur a ni ang.


ZPM Chhung Inkhawm nei

ZPM Party Vice President, Lalthansanga (Chatea) chuan nimin-a ZPM in Aizawl-a Chhung Inkhawm an neih ah kan ram political party zawng zawng ten kan ram an thlauhthla nia sawiin, chu chu ZPM chuan tundin an tum niin a sawi a. Tuna kan ram dinhmun ngaihtuah hian a lungchhiatthlak em em tih sawiin, “Ramri-ah nise kan thenawm ram ten hlauhna leh zahna chhete mah nei lovin mi an palzut a, kan Sakhua thlengin nasa takin min suasam ta a ni. He kan ram tluchhe mek tung-ding tur hian thalaite tha kan ti chak thar dawn a, Kohhran hote tawngtaipuina leh mipuite thawh-puina zarah kan ram tan ZPM hian ke kan pen zel dawn a ni,” a ti bawk.

Vaccine pek pung zel

Nimin tlai thleng khan Mizoram-ah mi 15,749 te hnenah COVID-19 Vaccine Dose 1-na pek an ni tawh a, mi 3088 te hnenah Dose 2-na pek a ni tawh bawk.

Comments

Chhiar Hlawhte