Latest News

Kum 2020-2021 chhungin SEDP hnuaiah State Fund atangin vbc. 82.45 pek a ni tawh

Mizoram Larsap, PS. Shreedaran Pillai chuan Sawrkar kum kal mek 2020-21 chhungin State Sawrkar Flagship Programme, SEDP hnuaiah State Fund atangin hmasawnna hna thawh nan Department hrang hrangah cheng vbc. 82.45 pek a ni tih a sawi.

Nimin-a Mizoram Legislative Assembly Budget Session thutkhawm tan ni-a House-a thu a sawi ah Mizoram Governor chuan Sawrkar kum kal mekah hian Socio-Economic Development Policy (SEDP) hmanga hna thawh nan State Fund atangin cheng vbc. 148 ruahman a ni tih a sawi a. Hetiang a nih mek lai hian COVID-19 hri leng avangin ruahman lawk angin thil a kalpui theih ta lova, loh theih lohna avangin SEDP atan sum ruahman hi zaa 15-ah tihhniam niin, cheng Vbc. 82.45 chu Department hrang hrangah hmasawnna hna thawh nan pek a ni tih a sawi.

Larsap thusawiah hian State Sawrkar Flagship Programme, SEDP hnuaia hmalakna pui ber tura Chief Minister, Zoramthanga'n a lo sawi tawh Rua chungchanga hmalakna tarlan a ni lova, hetihrual hian Bamboo Development Agency-in Zuangtui Industrial Estate Aizawl chu tichangtlungin, hna pawh zaa 99 thawh zawh a nih tawh thu a tarlang a. National Bamboo Mission atangin helai hmuna Processing Unit pali (4) dinna tur te, Bamboo Waste Management Unit pathum (3) dinna tur te, Handicraft or Cottage Industry Unit pali (4), Furniture Making Unit pali (4) leh Stick Making Unit panga (5) dinna tur cheng Vbc. 4.75 hmuh a ni a, hei bakah hian Phuaibuai khuaa Handloom Production cum Training Centre dinna tur cheng Vbc. 3.50 Project siam chu NEC-in a pawm tawh thu Larsap hian a tarlang tel thung a ni.

Larsap PS Shreedaran Pillai chuan, MNF leh India sawrkar-in kum 1986-a Mizoram Accord an ziah Vawiin thlenga vawnnun a ni leh remna leh muanna mipuiten kengkawh a, boruak ralmuang tak hnuaia an khawsa chhunzawm zel chu chhuanawm a tih thu a sawi a. Nikuma COVID-19 hri leng vanga harsatna thleng chungchangah pawh mipuiten Sawrkar hmalakna tha taka an tawiawm chu thil lawmawm tak a ni, a ti a. Mizo-ram chu ram chhung State hrang hrang zingah hri kai tlemna ber a ni satliah mai lova, hri vanga thi tlemna ber a ni tih sawiin, Health Department hmalakna a fak bawk. Larsap chuan, kumin January ni 16 atang khan Mizoram-a Health Care Worker-te COVID- 19 Vaccine pek tan an ni a, tunah hian Health Care Worker Vaccine la tura inziaklut 15,697 chu pek zawh tawh niin, Frontline Worker 27,557 te pawh March thla atanga Vaccine hi pek tan theih beisei a ni tih a sawi.

Heng bakah hian Larsap hian Mizoram Sawrkar hmalakna leh hnathawh hrang hrang te he hunah hian a tarlang bawk a ni. 

House-a Larsap in thu a sawi avang hian nimin thutkhawm ah zawhna leh chhanna hun hmang lovin thu a sawi zawh hnu hian Aizawl North-III bialtu MLA, C. Lalmuanpuia chuan Larsap thusawi chungchanga lawmthu sawina Motion a pulut a, Speaker,  Lalrinliana Sailo-in Budget Session neih tura Business Advisory Committee Report a pharh bawk.

Hemi hnu hian 26th Serchhip Assembly Constituency bialtu MLA, Lalduhoma chu  Anti Defection Law an tih mai, Para 2 (2) of the Tenth Schedule of the Constitution of India a bawhchhiat avangin nikum November ni 27 khan MLA atanga ban a ni tih Speaker chuan House hi a hriattir bawk a ni.

Budget Session hi Vawiin chawhma dar 10:30-ah chhunzawm a ni dawn a, thut-khawm tan rualin Session hnuhnung ber leh tun Session inkara ram hruaitu boralte sun a ni dawn a. Chumi hnuah zawhna leh chhanna hun hman chhunzawm tur niin, Larsap thusawi chungchanga nimin-a lawmthu sawina Motion putluh hi sawiho a pass tum a ni bawk ang.

Comments

Chhiar Hlawhte