Thisen pek-ah kan thangharh zel

Thisen pek-ah kan thangharh zel

Niminpiah khan Mizoram-a Blood Bank hrang hrangah Valentine’s Day pualin damlo a mamawh ten an mamawh huna thisen an hmuh mai theihna tura a thlawna thisen pekna hun buatsaih a ni a, he hunah hian Serchhip Blood Bank-ah pawh mi tlawmngai 38 zet ten thisen an pe a, hetianga kan thalai ten damlo mamawh ten an mamawh hun taka a thlawna thisen an dawn theihna tura phal taka thisen an pe hi a lawmawm hle mai a. Hun lo kal zel turah pawh thisen pe thei nih a hlut zia kan hriat a, thisen pek kan uar zel pawh hi a pawimawh hle a ni.

Serchhip mipuite hian tunhma deuh atang khan Blood Bank neih hi kan duh em em a, kan sawrkar hmalakna zarah Blood Bank te neiin a tir lamah thisen pek kan uar lo na-chungin tunah chuan Mizoram-a Blood Bank hrang hrangte zinga thisen dawng tha ber pawl kan ni ta deuh reng mai a. A bik takin Kohhran thalai leh zirlai pawl hminga thisen pe te hi thisen pe tam ber ni chho mekin hei hian rikrum thil a lo thlen pawhin thisen kan mamawh ang kan hmu zung zung thei thin a, damlo nun chhanna pawimawh tak a ni.

Thisen hi kan nunna pawimawh tak niin a aiawh thei erawh siamchhuah a la ni lo a, hei vang hian thisen kan hmuh theihna chu thisen kan pek hi a ni mai. Hei vang hian damlo ten an mamawh hun taka thisen an hmuh theihna tur hian mi tlawmngai te kan penchhuah zel hi a pawimawh a, thisen hi damlo ten an dawng dawn a nih chuan uluk taka enfiah hmasak a tul thin avangin engtik lai pawha hman mai theih tura dahkhawl hi damlo nun chhanna atana pawimawh a ni tih hriaa thisen pek hi kan uar-a kan intihhmuh zel pawh a tul hle a ni.