Chanchin thar thenkhat :

AMC inthlanna ah Vote thlak

Aizawl Municipal Corporation (AMC) inthlan vawi 3-na atan nimin khan mipui ten Vote an thlak ta a, khawi atang mahin thil duhawmlo a thlen hriat a ni lo. He inthlanna neih ah hian nimin zing dar 7:00 atang khan Polling Station hrang hrangah Vote thlakna hun hawn niin he thu buat-saih lai thleng hian Vote zaa 60 vel a tla tawh a, nizan lam khan Vote tlak dan kimchang hi hriat theih beisei a ni. AMC inthlan ah hian Ward 19-ah inthlanna neih niin Candidate 66 an awm a, he inthlanna a hman EVM te hi Strong Room a dahkhawm a nih hnuah naktuk chawhma dar 10:00 atangin Vote tla te hi chhiar a ni ang.

Ar vulh dan zirhona nei tan

Nimin khan Lawngtlai-ah ni 5 chhung awh tur thalai kut hnathawktute tana Ar vulh dan zir-hona chu neih tan a ni a, he hun hmanpuitu District Bawrhsap, Dr. Andrew H. Vanlaldika chuan Mizoram kuthnathawktute chu an thatchhe lova, tunlai thiamna hman tangkai kawngah kan la hnufual deuh avangin a hlawk tur angin an la hlawk lo mai chauh zawk a ni, a ti a. Tunlai thiamna leh hnathawh dan hlawk zawk hmang thei turin intuaihriam fo a tul thu a sawi bawk. He training hi Skill Training of Rural Youth (STRY) hnuaia buatsaih niin, India ram hmun hrang hrang leh Lawngtlai District-ah pawh buatsaih a lo ni tawh thin a ni.

Buhfai ti riral lo turin hriattir

Lunglei DCSO chuan thuchhuah siamin an District chhungah February, 2021 atanga chuan Ration buhfai sem chu Online Mode-a kalpui tur a nih thu leh e-POS online transaction chung-changah harsatna hrang hrang- kutzungpui (Fingerprint) hmuh theihloh leh chhan dang vanga e-POS khawl hmanga buhfai pekchhuah theihloh te chu thu leh awm hma chuan an lo nghak phawt tur a nih thu lehan chanpual tur buhfai te hi Retailer ten an lo ti riral tur a nilo tih a tarlang a. Ration Card leh Aadhaar Card thlunzawm tan chuan Ration hi lak theih a nih thu a tarlang bawk.

YMA in hnathawh mek enfiah

Central YMA leh Mizoram PWD inremna lo siam tawh bawhzuiin niminpiah khan Buarpui Group YMA hruaitute chuan an Group huam-chhunga PMGSY hnuaia Dengsur leh S. Khawlek inkar kawng siam mek chu an enfiah a, he hunah hian YMA hruaitute hi hna thawktu ten an lo dawngsawng a, helai hmuna hnathawh enfiahtu YMA hruaitute chuan hnathawh mek te a tlangpuiin a tha thawkhat tih sawiin, Side Drain cover zauh belh leh thildang siamrem hlek hlek ngaite pawh Contractor te hnena hma la nawn leh turin an ngen a. Contractor-te pawhin Group YMA hruaitute ngen angin hmalak nghal an tum thu an sawi a ni.

Mi bo 2 zawn mek an ni

Kar kalta Zirtawpni atanga a chin hriatloha bo, Zoramsangi (42), Sialhawk chu khawtlang huapa zawn hna thawh mek a ni. Thudawn danin Zoramsangi hi Biate khua, Sialhawk-a pasal nei niin kar kalta Zirtawpni chawhma lam khan Biate atangin Scooty a chuangin Sialhawk a pan a, Sialhawk khaw luh hmaaa chhukin kawng thlang-ah a peng a, hemi ni vek chawhnu herah Sialhawk khua ah hmu awm mah se chin hriat a ni zui ta lo a ni.

Tun thla ni 9-a Darlawn atanga Sunhluchhip a haw tur chin hriatloha bo zui ta, Chalrokunga (40), Sunhluchhip pawh nimin thleng khan khawtlang huapa zawn hna thawh chhunzawm zel niin he thu buatsaih lai thleng hian hmuh ala ni lo bawk.