Serchhip-a Khawnvartui sem tur chungchang chhui turin Supply Department hotute ngen

Serchhip District Consumers’ Association (SDCA) chuan Serchhip mipuite hnena Khawnvartui sem tur tih chingpenna awm ngeia lang chu chhui chhuah a, a mawhphurtu chu a tul anga hrem turin Supply Department hotute an ngen tih an sawi.

Nimin-a thuchhuah an siamah Serchhip District Consumers’ Association (SDCA) chuan Feb. 16, 2021 khan Serchhip-a Retailer pathum a sem tur Khawnvartui chu Motor (MZ-01-M-5334), Lalchhanhima, Vairengte ami khalh chuan rawn phurin, Serchhip-a Retailer te hian an Khawnvartui chan ai tur chu kiam deuha an hriat avangin Legal Metrology leh Serchhip District Consumer Association hruaitute chu enfiah sak turin an ngen tih an tarlang a. Challan a lan danin he Tanker hian Khawnvartui Litre 12,000 a phur a, hetihlai hian Serchhip-a Khawnvartui Dealer 3 hnenah hian Litre 3266 theuh Driver in Unload tura a tih anga Unload a ni tih tarlangin, an unload zat leh Challan enmilin Khawnvartui hi litre 2258.8 in a kim ta lo tih an tarlang a ni.

SDCA thuchhuah chuan hemi chungchangah hian Driver hi thu zawhfiah a nih thu leh Driver chuan Serchhip DCSO in dah tura a tih zat a unload mai thin thu a sawi nia tarlangin, tun tumah pawh hian DCSO in kawng lakah khawnvartui hi Barel 10 a hralh tir thu leh, a man pawh Aizawl-ah DCSO a pek nghal thu a sawi bawk tih an tarlang a. He thil thalo tak mai, mipui chan ai tih chingpenna awm ngeia lang hi chhui chhuah a, a mawhphurtu chu a tul anga hrem turin Supply Department hotute an ngen tih an tarlang a ni.

SDCA chuan Serchhip-a Khawnvartui Retailer te’n an Khawnvartui dawn zat tur an hre ngai lo leh Driver in a rawn dah ang ang an sem mai thin ni a an sawi chu a fello hle nia an hriat thu pawh sawiin, tun hnuah chuan khawn-vartui semtu Retailer te’n an sem zah tur leh an dawn zah tur Order felfai dawng thin tawh se an duh tih an sawi bawk a ni.

Vawiin atang hian Serchhip-ah Ration Card nei te tan Khawnvartui hi sem leh a ni dawn a, Ration Card pakhat ah Litre hnih leh a chanve zel-a sem tur niin, Retailer pakhat chuan Khawn-vartui hi Ration Card nei te hnenah an hralhchhuah thin thu leh a la thei list hi DCSO Office atanga an lakchhuah ngailoh thu a sawi a ni.