Thianghlim taka politics kalpui a tul

Thianghlim taka politics kalpui a tul

Serchhip bialtu MLA ban a nih avanga MLA bye-election neih tur atan kan Political Party lian te chu an inbuatsaih chho mek a, tunah hian party lian pathum te candidate tur pawh hriat theih ni tawhin rorellai MNF Party chuan Ruling Party MLA thlantlin pawimawh zia an rawn aupui ngei dawn niin a lang a. Hetihlai hian eptu party lam chuan Bial chhung mi ngei thlantlin a pawimawh zia an aupui ve dawn niin a lang bawk a, ZPM lam chuan bialtu MLA ban takin MLA Fund hmanga hna a thawh leh bial tana hma a lo lakna bakah mipuite khawngaihna dilin an rawn campaign leh ngei dawn niin a lang chho a ni.

Serchhip bial hi kan hriat angin Mizo-ram laili-a awm niin hetianga kan bialtu MLA ban a nih tak hnuah phei chuan Mizoram Politics mit chu kan bial-ah hian fu vek emaw tih mai tur a ni a. He inthlanna neih tur hian kan hma, kum 2023-a MLA inthlanpui neih tur pawh thui tak a hril thei dawn nia a lan avangin kan Political party te pawhin thapui chhuahin hma an rawn la ngei dawn a, chuvangin kan bial mipuite hian ngaihtuahna fim tak hmanga kan Bial tana mi tha tur kan lo thlanchhuah hi a pawimawh dawn hle a ni.

Kan rama Politics kan kalpui danah hian mi tam tak chuan ‘Politics chu thil tha aia thalo chinna, a tha reng pawh kan lam-tang an nih loh chuan sawiselna leh a thalo pawh kan lamtang a nih chuan sawimawi hramna’ emaw kan ti ta mai ni te hian a lang thin. Amaherawh chu Politics hi kan ram-a kan inkaihhruaina pawimawh ber, kan ram dinchhuahna tura hmanraw pawimawh a nih avangin thianghlim taka kan khela kan kalpui hi a tul a, chutiang tur chuan mipuite pawhin kan rilru kan siam zel a tul hle a ni.