Latest News

Chanchin thar thenkhat :

CM hovin thutkhawm nei

Mizoram State Health Care Society (MS-HCS) Governing Body chu nimin khan an Chairman, Chief Minister Zoramthanga hovin Chief Minister Office Conference Hall-ah an thukhawm a, he hunah hian Mizoram-a Cancer leh Hepatitis enkawlna senso a hniam zawk theih nan hmalak dan tur sawiho niin damlo inenkawlna kawnga huamzau zawka Health Care ham-thatna neih dan ngaihtuah turin Chief Secretary kaihhruaina hnuaiah Committee din nise an ti a ni. He Meeting hian Principal Chief Executive Officer (PCEO) post siam thar a nih angin CEO Office tia hriat thin chu ‘PCEO Office’ tia thlak tura rawtna chu a remti a, Private Hospital te nena thawhhona te sawiho a ni bawk.

October 2020 atanga January ni 31, 2021 chhung khan MSHCS hnuaiah chhungkua 1,12,427 awmin, Claim 7848 a lut tawh a. AB-PMJAY Scheme hnuaiah hemi hun chhung vek hian Golden Card 4,33,842 pekchhuah niin claim 935 a lut tawh bawk a ni.


DC pahnih ten inbiakna nei

Assam-a inthlanpui neih tur muanawm leh felfai tak neih a nih theih nana thawhho dan tur chungchangah nimin khan Kolasib DC, Dr. H. Lalthlangliana leh Hailakandi District Bawrhsap, Megh Nidhi Dahal te chuan Kolasib-a NIC Video Conferencing Room-ah inbiakna an nei a. He hunah hian Bawrhsap pahnihte hian Hailakandi leh Kolasib District inrina hmunah te boruak ralmuang a awm theih nan te, Zu leh damdawi tawlhruk dapchhuah kawnga thawhho dan turte, inthlang tur a inbuatsaihna kalpuina kawnga thawhho dan turte sawi a ni.


Art Workshop hawnna nei

I&PR Department leh Mizoram Art Development Society tangkawp in an buatsaih ni 4 chhung awh tur ‘Ramtuk Thla Art Workshop, 2021’ chu nimin khan Art & Novelty Gallery, Chaltlang-ah I&PR Secretary, Sangdingliana chuan a hawng a, Artist 51 an tel a ni.


Budget sawihona buatsaih

BJP Mizoram Pradesh chuan nimin khan Hotel Regency Conference Hall, Aizawl-ah Union Budget, 2021-2022 sawihona hun an buatsaih a, he hunah hian an President, Vanlalhmuaka chuan hetiang sawihona hun hi an buatsaih tawh thin thu leh Intellectual te rawtna chu Central-ah thlen thin niin, chungte chu Union Budget-ah pawh an ngaihpawimawhna a lo lang thin niin a sawi.


Lalduhoma’n hmanpui

ZPM Leader, Lalduhoma chuan nizan hmasa khan Falkland Valleyball Court-a Vantlang Inkhawm ah ZPM zawm thar mi 104 a lawmlut a, he hunah hian Lalduhoma chuan tun dinhmunah Zoram dung leh vangah ZPM-in hma a sawn nasat thu sawiin, Party pahnih ten nasa takin bei mah sela ZPM thlipui a tleh mek thu a sawi.


MJA Conference hmanpui

MJA Champhai District chuan nimin khan Champhai Press Club-ah Annual Conference vawi 33-na hmangin Law & Judicial Minister, TJ. Lalnuntluanga chuan khuallian niin a hmanpui a, Chanchinbumite chu mipui sukthlek a tha zawnga her danglama kaihruai thei tura zirtirtu pawi-mawh tak an nih thu sawiin, an thuchhuah turte finfiah hram hram thin tur leh an thudawnna te tarlang thin turin a chah bawk. MJA Champhai District hi December ni 31, 1988 khan ‘Champhai Journalist Association’ (CHJA) ti a din a ni a. February ni 11, 2006 khan ‘MJA Champhai District’ ti-a thlak a ni a, a dintute zinga 3 ten tun thlengin an la telpui thei a ni. Tun dinhmunah Member 15 an awm mek a, heng zinga 12 hi Cham-phai-a awm niin Khawzawl-ah mi 3 an awm a, Champhai District-ah hian Daily Newspaper 3 leh Local Cable TV 2 a awm mek a ni.


Champhai Master Plan sawiho

Champhai Town Planning & Development Committee chu nimin khan Champhai DC Conference Hall-ah thukhawmin Champhai khawpui leh a chhehvel cheibawla hmasawnna ruhrel siam dan tur, Champhai Master Plan 2031 chungchang ah inrawnkhawmna an nei a. He hunah hian Cham-phai Town Area chhungah mihring 45,225 an awm mek thu leh kum 10 a liam leh hnu, kum 2031-ah chuan mihring 59,589 awm tura chhut a nih thu tarlan a ni.

Comments

Chhiar Hlawhte