Thian chhan thih ngam - Mizote

 Thian chhan thih ngam - Mizote

    Mizoram leh India ram mai ni lo, khaw-vel in hri leng avangin harsatna nasa tak kan tawk a, kan District-ah pawh hri leng avang hian harsatna tawkin, a bik takin hriselna lam khawihtu kan sawrkar Department lam pawh an indaihlo hle a, he harsatna thleng hian thla 11 vel zet min chiah tawh hnuah tunah chuan harsatna zualpui chu a reh chho tan mek niin a lang a. Kan hmalam hunah enga lo thleng tur hre lawk chiahlo mah ila hri leng pawhin ziaawm lam pan zel turah beisei ila.
    Hetiang a nih lai hian nikum kum lai-hawl vel atang khan kan District-ah pawh hri leng dona kawnga thawk tura hlawh beisei hauh lova inpe mi engemaw zat kan nei a, sawrkar in thla li (4) lai lawmman pe mah se tun thlenga hlawh leh lawmman beisei hauh lova hri leng dona kawnga thawk tura mi inpe, mi 12 lai kan la nei hi a lawmawm hle a ni.
    Kan hriat angin hri leng in ziaawm lam a pan avang hian mipui nawlpui chuan kan nitin khawsak phung pangngai kan zawh leh tan mek a ni a, hetihlai hian mipui ten nun-phung pangngai kan zawh theihna tur hian heng hri leng dona kawnga thawktu kan sawrkar mi leh sa te leh hlawh nei lova thawktu inpe te hi hri leng avanga pawnlam pawh chhuak thei mang lova kan awm lai atanga tun thleng hian an la buai em em a, mipuite pawh hian an inpekna te kan hriatpui a tha hle a ni.
    Mizote hi ‘Thian chhan thih ngam’ inti kan ni a, tunhma angin sa leh ral hmaah kan huaisenna lantirna a awm tawhlo pawh a ni thei e. Amaherawh chu tunlai-ah chuan heng mipuite tana tlawmngai taka thawktu sawrkar Department leh VLTF mi leh sa bakah hlawh beisei hauh lova inpe te hi thian chhan thih ngam-a inpe tih loh theih an ni awm love.