Syncot International ten khaw vawt vangin a hun takah hna an zo theilo niin an sawi

Serchhip Sports Complex-a Synthetic Running Track siam hna thawktu Syncot International chuan an hnathawh mek chu an beisei hunah zo hmanlo mah se karleh Thawhtanni-ah khian zawh hman an beisei thu an sawi.

    
Nikum December thla khan kan Palai chuan Serchhip Sports Complex-a Synthetic Running Track siam hna thawh mek hi tlawhin helai hmuna hna thawktu, Syncot International mi te chuan hri leng avanga harsatna an tawh hnuah October 27, 2020 khan hna thawk tanin January thla chhunga an zawhfel hman tur thu an sawi a. He an huntiam ah hian an zawh hman takloh avangin nimin khan kan Palai chuan he hna thawh mek hi tlawh lehin an hnathawhna kawnga harsatna an tawh te a zawtfiah a, helai hmuna hnathawktute chuan Thlasik khawvawt avanga harsatna an tawh chu an harsatna lian ber a nih thu sawiin, khua a vawh hma avangin Synthetic Track phahna tura an hmanrua te duh anga a hman theihloh avanga hnathawh hi an khaihlak thu an sawi a, hei bakah hian Krismas vuakvet-ah hlawhfa rawih tur duh ang an hmuhloh avang pawhin an hnathawh kawngah harsatna an tawh thu an sawi a, tunah chuan khua in lum lam a pah chhoh leh tak hnuah ngawrh taka hna an thawh leh tawh thu sawiin, harsatna dang a awm a nih loh chuan karleh Thawhtanni, February 8, 2021 khian Running Track bik hi zawhfel theih an beisei thu an sawi a ni.

Syncot International-a thawktute hian Sports Complex-a Synthetic Running Track phah bik hi khawihin, an hnathawh ang te an thawh zawh hnu hian Line Marking tih leh anih dawn thu an sawi a, hemi khawih tur hian mi thiam bik pawh an lo kal leh tur thu sawiin, a hmanrua turte pawh Mizo-ram-ah lei tur a awmloh avangin hmundang ami chah leh a ngai dawn niin an sawi a, chung zawng zawng chu a zawh hunah UD&PA Department kutah an hnathawh te hi an hlanchhawn tawh tur thu an sawi bawk a ni.