Latest News

Chanchin thar thenkhat :

Smart City project thlirho

Chief Minister, Zoramthanga hovin nimin khan Aizawl Smart City Project kal mek a hmalakna hrang hrangte CM Cabinet Meeting Room-ah thlirho a ni a, heng zingah hian Common Biomedical Waste Treatment Plant, Smart Ambulance, Step/Stairs Improvement, Smart Bus Stop, Digital Library, Open Gym, Khelmual siam leh a dangte a tel a. Chief Minister chuan Aizawl Smart City hnuaia hmalakna te chu Mizoram State Sawrkar hnuaia hmasawnna hna thawh mek leh hmachhawp te nen insu buai lova, ram hmasawnna tura hlawk zawka an tan tlan theih nan ruahmanna fel taka siam turin a chah a ni. 


Bank hmalakna thlirlet

Nimin khan Champhai-ah District Consultative Committee (DCC)/ District Level Review Committee (DLRC) chu an Chairman District Bawrhsap, Maria CT. Zuali hovin an thukhawm a, he hunah hian September 2020 Quarter tawp thlenga Champhai District-a Bank te hmalakna thlirlet niin tun dinhmunah hian Champhai District-ah Bank Branch hrang hrang 15 awm mekin, Public Sector Bank 4, Private Sector Bank 4, Regional Rural Bank 6 leh State Cooperative Bank 1 te an awm mek a. ATM 9, Business Correspondent 8, CSP 1 leh IPPB hnuaia Banking Touch Point 26 te an awm mek a ni.


Edn. Minister in bial fang

Tuivawl bialtu MLA leh Education Minister, Lalchhandama chuan a bial chhung khaw hrang hrang fang chhunzawm mekin nimin khan Sawleng, Kepran,  E. Phaileng leh Pehlawn khua te a tlawh a, heng khua ah te hian sawrkar Sikul, sawrkar hmunhma dangte leh Hall te a tlawh a, khawtlangin harsatna an neih leh an mamawhte a hmunah a en dik a ni. Education Minister chuan COVID-19 hri leng avangin MLA Fund pawh a awm thei rihlo tih sawiin, Central atangin sum a lo kal hlei thei rihlo tih a sawi a, Fund lo kal chhun ang ang pawh hrileng do nan leh mipui mamawh zual atan hman a ngai tih a sawi bawk.


Dan bawhchhiatna niin sawi

ZPM Party chuan niminpiah khan chanchinthar hmun hrang hrang mai bakah, sawrkar thuchhuahna I&PR Website-ah (No.7424/2020-2021) Aizawl Convention Centre sakna tur cheng nuai 4899 chungchang te, Kolasib Saidan Veng-a Football Astroturf Ground chungchang te leh sawrkar hma-lakna tur hrang hrang niawm tak chungchangte puanzar a ni tih sawiin, he thil hi Election Code of Conduct puan hnua thil thleng a nih avangin Dan bawhchhiatna chiangtak a ni tih an sawi a, hetianga thil tih hi an dem thu an sawi bawk.


BJP ten Complain thehlut

BJP Mizoram Pradesh chuan Delhi a cham mek Minister, Robert Romawia Royte hnena Aizawl Convention Centre sakna tur cheng nuai 4899 Assistance to Central Agencies hnuaia Approval Minutes leh Administrative Approval te Tourism Ministry ten lo hlan anga Social Media-a vawrhdarh, DIPR, AIR Aizawl Station in a puang chiam chu AMC Election atana Model Code of Conduct Rules bawhchhiatna lian takah an ngai tih sawiin, nimin khan Aizawl Addl. DC-ah complain an thehlut tih an sawi.

Comments

Chhiar Hlawhte