Latest News

Serchhip Sub-Hqrs. YMA hruaitu thlanna neiin President-ah Kawlthuama thlantlin a ni

Serchhip Sub-Hqrs. YMA chuan nimin khan kum 2021-2023 chhunga hruaitu tur thlanna neiin President atan Kawlthuama, Serchhip Kawnpui North Branch chu thlan a ni.

Serchhip Sub-Hqrs. YMA hruaitu thlanna hi nikum April thla-a neih tur kha a ni a, amaherawh chu COVID-19 hri leng in a nanchin tak avanga inthlanna neih theih a nih loh hnuah nimin khan hri leng laka himna tura sawrkar ruahmanna siam te zawm chungin inthlanna hi neih a ni a. He hun hi Serchhip Sub-Hqrs. YMA President kalchhuak tur, R. Sanghmingthanga chuan kaihruaiin YMA Sub-Hqrs. Serchhip President hna Term hnih a chelh chhunga OB, SEC leh YMA Member ten thawhhona tha tak an nei chu lawmawm a tih thu a sawi a. Hei bakah hian Sub-Hqrs. YMA hnuaia Group hrang hrang te nen thawhhona tha tak an nei chho zel pawh lawmawm a tih thu a sawi bawk. Branch leh Group YMA hruaitu kalkhawmte chu an huam chin theuh ah Ruihhlo do kawngah te, hmasawnna hnathawh hrang hrang tha taka thawh a nih theih nana enzui kawngah te ram leh hnam tana theihtawp chhuah turin a chah a. Hruaitu thar thlanchhuah te pawh hma hruaitu ni tur leh a tul huna hnung dawl leh member ruala kal thei turin a chah a, Zo hnahthlak zawng zawng phuarkhawmtu YMA kaltlanga ram leh khawtlang tana ke pen zel turin YMA memberte a chah bawk a ni.

Nimin-a Serchhip Sub-Hqrs. YMA hruaitu thlanna hunah hian Sub-Hqrs. YMA huam-chhunga Vote nei thei mi 500 dawn atangin mi 300 chuang an kal a, kum 2021-2023 chhunga hruaitu atan heng mite hi thlanchhuah an ni :

President : Kawlthuama, Serchhip Kawnpui North Branch

Vice President : Lalrammawia, Serchhip Chanmari Branch

Secretary : PC. Vanlalluna, Chhiahtlang Zotuithiang Branch

Asst.Secretary : K. Laltlanmawia, Chhekhnai Branch

Treasurer : C. Lalrammuana, Serchhip Field Veng Branch

Fin.Secretary : Zolianmawia, Serchhip Vengchung Branch

Serchhip Sub-Hqrs. YMA huamchhungah hian Group pathum- Tuichangral South, Vantawng leh Tawitlang Group te awm mekin Branch YMA 71 a awm bawk a, a hmaa Branch 72 awm thin chu Khawzawl Sub-Hqrs. ah Biate Branch an awm tak avangin Branch awm zat hi pakhat in a tlem leh a ni.

Comments

Chhiar Hlawhte