Inkhunghrang awm tawhlo

COVID-19 hri leng avangin Serchhip District-ah mahni In leh sawrkar hmunhma-a inkhung-hrang an awm tawhlo.

Serchhip CMO Office atanga thu kan dawn danin Serchhip District-a hri leng avanga mahni In lama inkhunghrang mi pakhat chu a Sample enfiah a nih hnuah hri laka a fihlim avangin nimin khan inkhunghrannna hmun atanga chhuahtir a ni a, heti hian tun dinhmunah Serchhip District-ah hri leng avanga mahni In leh sawrkar hmunhmaa inkhunghrang awm tawh lovin hri leng avanga State pawn atanga rawn haw te khunghran an nih, nikum April thla atanga inkhunghrang an awmloh lehna hmasa ber a ni.

Heti hian nimin thleng khan Serchhip District-ah hri leng avangin mi 6604 te Sample enfiah a ni tawh a, heng Sample enfiah te hi RT-PCR hmangin 1137, TrueNat Laboratory-ah Sample 2589 leh Rapid Antigen Test (RAgT) hmangin Sample 2878 te an ni a. Heng Sample enfiah tawh te atang hian Serchhip District-ah COVID-19 hri kai mi 180 hmuhchhuah ni tawhin an zinga mi 179 te chu enkawl dam an ni a, hri kai hmuhchhuah zingah nunna chan mi pakhat awmin kumin January 20 hnuah Serchhip District-ah hri kai hmuhchhuah an awm leh tawh rihlo a ni.