Latest News

Serchhip District chhunga thingtlang khaw 18-ah In tin Tui Connection pek an ni tawh

Kum 2019-2020 chhungin Serchhip District-ah Jal Jeevan Mission (JJM) hnuaiah Serchhip District chhunga thingtlang khua 18-ah In tin te Tui Connection pek ni tawhin kum 2020-21 chhung hian District chhunga thingtlang khaw 7-ah Tui connection pek hna hi thawh mek a ni bawk.

Nimin khan Serchhip DC Meeting Hall-ah District Water & Sanitation Mission (DWSM) thutkhawm neiin he hunah hian Jal Jeevan Mission (JJM) hnuaia Serchhip District chhunga hmalakna hrang hrangte tarlanah he thu hi tarlan a ni a, he thutkhawm ah hian PHE Serchhip WATSAN Division-a Sr. Executive Engineer, Er. F. Lalsanglura chuan JJM hnuaia an hmalakna te tarlangin thingtlang-a In tin te Tui Connection pe tura JJM hnuaia hma an lakna, House Hold Tap Connection (FHTC) hnuaiah kum 2019-2020 chhungin thingtlang khaw 18-ah hmalakna zofelin Tui Connection 3133 pek a nih thu a sawi a. Kum 2020-21 chhung hian khaw 7-ah Tui Connection pek hna hi thawh mek niin Tui Connection 1005 pek leh tur anih thu leh kum 2021-22 chhungin khaw 13-ah Tui Connection 2870 pek leh tum anih thu a sawi bawk.

DWSM thutkhawm hi an Chairman leh Serchhip District Bawrhsap, Kumar Abhishek chuan kaihruaiin Serchhip District hnuaia Jal Jeevan Mission leh Swachh Bharat Mission (Grammen) kalpui anih dan chu tha a tih thu leh hma lam pan zel tura a duh thu a sawi a, District Eduction Officer chu School-a Ek In thalo te lo endik a, Fund an neih ang anga lo cheitha turin a ngen a. Fund in a daih lo anih chuan PHE Department lam lo hriattir tur leh a tul anga PHE Department lam te lo bawhzui turin a ngen bawk a ni.

He thutkhawm ah hian PHE Serchhip Division-a Sr. SDO, Er. Samuel LR. Ralte chuan Solar Pumping Scheme kalphung sawifiahna a nei a, an huamchhunga Buangpui khua a Solar Pumping Scheme kalpui a hlawhtlin dan te sawiin, JJM hnuaia Solar Pumping Scheme kalpuina tur khaw thenkhat ah pawh a hlawhtlin ngei a beisei thu a sawi bawk.

Ani bakah hian Er. PB Lalnunsanga, SDO PHE East Lungdar Division in Jal Jeevan Mission hnuaia Village Action Plan (VAP) siam anih dan sawifiahin, VAP hi khaw tinah WAT-SAN Committee hruaitute nen a siam anih thu te, a hmun ngei ah an mamawh hrang hrang te hmuh pui chunga siam anih thu a sawi bawk. Hei bakah hian Er. HL. Thangvuta, SDO PHE Tlungvel Division in Jal Jeevan Mission hnuaia Rain Water Harvesting Scheme leh Surface Water Collection kalpui anih dan te a sawifiah bawk a ni.

Swachh Bharat Mission (SBM) hnuaia Serchhip District chhunga hmalakna hrang hrangte District Coordinator, Samuel Lallawmzuala chuan tarlangin,Swachh Bharat Mission Phase-II ah hian Fund la dawn anih loh avangin Action Plan siam tawh sa pawh engmah la thawh theih anih loh thu a sawi bawk a ni.

Nimin-a District Water & Sanitation Mission (DWSM) thukhawm hian Jal Jeevan Mission hnuaia District Action Plan 2021-22 siam chu an pawm bawk a ni.

Comments

Popular News (Last 30 Days)