Serchhip District-a Tomato tharchhuah te Aizawl-a zawrh turin thawnchhuah a ni

Horticulture Department hmalakna a Serchhip leh a chhehvel a Tomato tharchhuah te chu Aizawl-a zawrh turin nimin khan Serchhip Mat phai atangin thawnchhuah a ni a, Horticulture Department changtu Addl. Chief Secretary, JC. Ramthanga chuan he hun hi a hmanpui a ni.

Serchhip Mat phai Chawm kai-a Tomato vailiamna puala Inkhawm tawi neih ah Horticulture Department changtu Addl. Chief Secretary, JC. Ramthanga IAS chuan Horticulture Department chu thlai chingtute thlawpa an hlawhtlin theih nana theihtawp chhuahtu an ni tih sawiin, an zara hna leh hlawh nei an nih thu a sawi a. Kuthnathawktu te an hlawhtling a nih chuan an Department pawh an hlawhtlin thu leh an hlawhchham a nih erawh chuan anni pawh an hlawhchham a nih thu a sawi. Nikum-ah COVID-19 hri leng avanga harsatna kan tawh thu pawh sawiin, hemi denchhena Vegitable Supply Chain kalpui ah Serchhip Mat phai-a thlai chingtute avangin Aizawl leh khaw hrang hrang ten chawhmeh eitur an neih phah chu lawmawm a tih thu a sawi a, kuthnathawktu te zinga Cheng nuai 22 chuang lalut an awm te chu a lawmpui thu sawiin, “Kan thawkho zel anga, in mamawh ang zelin kan theih chinah kan rawn ti ve ang,” a ti bawk.

He hun kaihruaitu Horticulture Department-a Director, Dr. Elizabeth Saipari chuan Mat phai-a thlai chingtute tan Horticulture Department dawr tura kal fo a harsat thin avangin thla thar (March, 2021) atang hian Serchhip Mat Phai-a Chawm kai-ah hian Horticulture Department chuan Site Office an hawn dawn thu leh hei hi chawlhkar tin Thawhtanni apianga dawr theih a nih dawn thu a sawi bawk.

Agriculture & Horticulture Cooperative Society, Serchhip President, PC. Siamliana pawhin sawrkar hmalakna leh duhsakna an dawn ah lawmthu sawiin, nikum-a Vegitable Supply Chain kalpui chu nasa taka an hlawkpui thu leh an sum hmuh pawh a let-a a pun thu a sawi a. Internet hmanga khawvel ramdang ten Tomato hlawhtling taka an chin dan an hmuh thin te a taka kalpui ve thei tura Horticulture Department in hma an lak sak leh thlai thartu ten an hralhna tur, Collection Centre te an sak sak chu lawmawm a tih thu a sawi bawk a ni.

He hunah hian Serchhip DHO, M. Vanlalzami Serchhip District-ah Off-Season a Tomato chin chu hlawhtling taka kalpui a nih tawh thu leh Green House Cluster pawh a ngah ber leh Tomato thar tam ber an nih thu sawiin, kumin ah hian a tumkhatna atan Season pang-ngaia Tomato tharchhuak tura hma an lak thu a sawi a, a tirah chhungkaw 200 velin chin tum mah se chhungkaw 100 velin an chin tak thu leh nakum-ah chuan a let engemaw zat thar theih an inbeisei thu a sawi bawk.

Nimin-a Tomato thawnchhuah hi Aizawl-a zawrh tura ruahman niin a vaiin Kg. 3327 zet thawnchhuah a ni a, hei hi mi 18 ten an tharchhuah niin Aizawl-ah hian Kg. khat Rs. 60/- zela zawrh tura tih niin Kg. 50 aia tam lei te tan Kg. khat zelah Rs. 50/- hisapa-a lei theih a ni dawn bawk a ni.

Addl. Chief Secretary hian Serchhip Mat phai-a thlai chinna hmun hrang hrangte tlawh nghalin Horticulture Department-a thawktu ten an hmalakna te an hrilhfiah bawk a ni.