Chanchin thar thenkhat :

Lunglei-ah Faina hnatlangpui

Urban Development & Poverty Alleviation Department in kumin-a khawpui fai inelna a buatsaih tuma District Hqrs. leh khawpui zawng zawng huap-a lawmman pakhat dawngtu Lunglei chuan an lawmman lak lawmna ni 2 chhung awh tur chu nimin khan an nei tan a. Nimin a ni 1-na ah khan Lunglei khaw pum huap faina hnatlang ‘Leitlangpui Faina Hnatlangpui’ neih niin Lunglei Sanitation Task Force Chairman, R. Vanreng-puia chuan he hnatlangpui hi hawngin, Lunglei khawpui faina atana theihtawp chhuah zel turin he huna kalkhawmte hi an intiam bawk a ni. He hnatlangpui-ah hian Town chhunga VC 24 ten an huamchhung theuh ah hnatlang neiin mi 6000 atanga 8000 vel hnatlang anga chhut an ni.

Sial vulhtute tan hawng

Fostering Climate Resilient Upland Farming System in the Northeast (FOCUS) Project First Installment kaltlanga Champhai-a AH & Vety Department in Lianpui khua-a Sial vulhtute tana Sial In tur an sak leh Tuikhur an siam te chu nimin khan hman theih tura hawn a ni a. Cham-phai District-ah hian Sial vulh khaw 20 an awm mek a, heng zinga khaw 10 thlan hmasak Kawl-bem, Vangtlang, Hnahlan, Tualcheng, Khuang-leng, Lianpui, Sazep, Vangchhia, Samthang leh Farkawn-a Sial vulhtute hnenah FOCUS hian hma la mekin Lianpui khuaah hian Sial vulh chhung-kaw 11 awmin Sial 120 an enkawl mek a ni.

Lawmman semna nei

Information & Public Relations Department leh Mizo Photographers Society tangkawpin kumin a Valentine’s Day Photo Competition an buatsaih a titha te hnenah nimin khan I&PR Director, Lallianpuii chuan lawmman a sem a. Tun tumah hian Lalnunpuia, Tlungvel chuan lawmman pakhatna dawngin Rs. 10,000/- hlan a ni a, J. Laltanpuia, Khawzawl in lawmman pahnihna leh C. Lalberema, Zobawk in lawmman pathumna dawngin mi 10 hnenah Consolation Prize Rs. 1000/- theuh hlan an ni bawk.

Faina, thianghlimna leh hriselna ah hmalak tum

Health & Family Welfare Board Vice Chairman, Dr. ZR. Thiamsanga, MLA chuan Champhai chu Faina, Thianghlimna leh Hriselna kawngah te an hnufual avangin tanlak tum anih thu a sawi. Champhai CMO hnuaia thawktute tana Reproductive Child Health (RCH) chungchang inzirtirna nimin-a neih a hmanpuina ah he thu hi sawiin Dr. ZR. Thiamsanga chuan hemi atan hian Clean, Beautiful and Healthy Champhai Project hnuaiah hmalak tum a ni tih a sawi a. Damdawi In fai inelna ah results duhawm tak Champhai District-a damdawi In te’n an nei chu fakawm tiin sumdawnna hmunpui Champhai-ah fai kawnga tanlak zual zel angaih thu a sawi bawk.

SEC in lawmthu an sawi

Mizoram State Election Commission chuan AMC inthlanna thianghlim, him, fel fai leh muanawm neih a nih theih nana theihtawp chhuahtu te chungah lawmthu a sawi a. Democracy innghahna pawimawh tak, Local Body Election ti hlawhtling tura thawk chhuak, vote thlaktu mipui zawng zawngte chungah pawh lawmthu sawiin, hun lo kal zel turah pawh Commission hmalakna te thahnemngai taka tawiawm turin a sawm nghal bawk.