Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Kum 15 chunglam zingah Mizoram chu zuk leh hmuam ti tam berna State a ni

Nimin khan Serchhip-ah 'District Level Advocacy Training on Tobacco Control' neih niin Mizoram chu India ramah zuk leh hmuam ti nasa ber State a nih thu leh puitling kum 15 chin chunglam zaa 58.7 te chuan vaihlo leh a kaihhnawih hmang anga chhut a ni tih tarlan a ni.

Serchhip District National Tobacco Control Programme (NTCP) buatsaih Serchhip Press Club-a 'District Level Advocacy Training on Tobacco Control' hi National Tobacco Control Programme-a State Nodal Officer, Dr. H. Lianthangpuia chuan rawn hmanpuiin Vaihlo Tur hian mihring-ah chhiatna nasa tak a thlen theih thu leh kan hmuh theih- Mit, Beng, Ka leh Hnar bakah kan thisen zam nen a khawihchhe vek thei tih a sawi a, hei vang hian Sawrkar pawhin ngai pawimawhin Health Department hnuaia Programme hrang hrangah te pawh a tel theih vek thu a sawi a. He hmalakna kalpui tur hian National Tobacco Control Programme (NTCP) ruahman a nih thu sawiin, he hmalakna hian zuk leh hmuam, Vaihlo ti thin te Vaihlo bawih atanga hruaichhuah leh a la tichhin lo ten an tih lohna tura venhim te chu a thiltum pawimawh ber a nih thu sawiin, he hmalakna kalpui tur hian Mizoram District 9-ah NTCP staff mi 4 theuh dah an nih thu a sawi bawk.

NTCP-a State Nodal Officer chuan World Health Organisation (WHO) hnuaiah khawvel ram 168 te chuan Vaihlo leh a kaihhnawih dona kawngah hma an la tih sawiin, India ramah pawh State leh UT tinah kaihhruaina siama hmalak a nih thu a sawi a. Zirchianna neih atanga a lan danin India ram chu khawvel ram hrang hrang zingah zuk leh hmuam ti nasa ber dawttu niin puitling kum 15 chin chunglam zaa 35 ten Vaihlo leh a kaihhnawih hmang anga chhut a nih thu leh India ram State leh UT zingah Mizoram chu zuk leh hmuam ti nasa ber niin puitling zaa 58.7 te chuan Vaihlo leh a kaihhnawih hmang anga chhut a nih thu a sawi a. Aizawl Medical Board in an chhinchhiah danin kum 2019-2020 chhung khan Mizoram atangin phai lamah damlo refer mi 97 awmin heng zinga za zela 92 te chuan Vaihlo leh a kaihhnawih engemaw ber an hman thu leh zaa 8 te chauh Vaihlo leh a kaihhnawih a fihlim an nih thu a sawi a, hetiang hi kan dinhmun a nih avangin kan thanharh a tul tawh hle tih a sawi bawk.

Nimin-a he hun hman hi NTCP-a Ser-chhip District Nodal Officer, Dr. Lalhlunpuii chuan kaihruaiin Serchhip-a thuthar thehdarhtute leh Political Party hrang hrang aiawhte bakah Health Department-a thawktute an tel a. Vaihlo leh a kaihhnawih ngawlveina leh a sim dan chung-chang ah Maria VL. Neihhlui, Counselor NTCP in zirtirna pe in an hmalakna hrang hrang a tar-lan bakah Vaihhlo leh a kaihhnawih nghei duh te tan Tobacco Cessation Clinic (TCC) chu Ser-chhip District Hospital Eye Ward chungah hawngin pan theih reng a nih thu a sawi bawk.

He hunah hian Vaihlo leh a kaihhnawih khuahkhirhna leh hremna, COTPA chungchang ah K. Lalremruata, State Consultant NTCP in zirtirna pe in vantlang hmun leh puipunna hmun-a meizuk khap a nih thu leh Dan bawhchhia te hremna pek an nih theih dan te a sawi a. Serchhip a Legal Metrology Department Inspector, Johny Zonun-mawia chuan Legal Metrology Act hnuaia Vaihlo leh a kaihhnawih khuahkhirhna chungchang sawifiahin, rampawn atanga Dan lova Sikret lakluh te chu man theih a nih thu leh hetiang ti thin te chu vawikhat manna ah Rs. 25,000/- thleng leh Dan bawhchhiat vawi hnihna ah Rs. 50,000/- thlenga chawitir theih an nih thu a sawi a. NTCP-a District Consultant, K. Hmingthan-sangi chuan Vaihlo leh a kaihhnawih chung-chang a hriat tur pawimawh leh hriselna a nghawng dan te sawiin, tunlai khawvel in a buaipui COVID-19 hri leng mek te chu zuk leh hmuam ti thin te tan a hlauhawm dan leh inkaichhawn a awlsam dan te a sawi bawk.

Comments

Chhiar Hlawhte