Latest News

Sairang Dinthar-ah Sipai hmunpui dah duhlo

Sairang Dinthar chuan an Veng huamchhung, Kolabari hmuna Indian Army hmunpui dah tumna an duh lo tih an sawi.

Inrinni khan Sairang Village Council leh tlawmngai pawl zawng zawng intelkhawm chuan Aizawl Press Club-ah thuthar lakhawmtute kawmin he thu hi an sawi a, he hunah hian Sairang Dinthar VCP, Sangkunga chuan Sairang Dinthar Kolabari-ah hian kum 2013 tawp lam atang tawhin India sipai hmunpui dah tumna a awm tawh a, an hriat veleh khawltlangin an duhlohna an lantir nghal a, sawrkarah tum engemawzat an duhloh thu pawh an thlen thin thu leh sawrkar hmasa pawhin an hraitthiam sak avanga hma an lak zui loh thu a sawi a. Hetihlai hian nikum December thla tawp lam khan tuna sawrkar mekte chuan Aizawl District Collector hnenah sipai ram an buatsaih theih nan NOC a dil thar leh nia sawiin, sawrkar tharin hetia a rawn tharthawh luih leh tak tlatah hian sawrkar hotute zingah hlawkna tel tum an awm a ni mai lo maw tih chu an ngaihdan a nih thu a sawi bawk.

Kolabari hmuna sipai dah an duhloh chhan sawiin Siarang Dinthar VCP chuan, Dinthar Veng mai ni lo, Sairang mi tam takin helai hmun hi Fur-ah an eizawnna hmun a ni a. Sipai an awm chuan mi tam tak eizawnna in a tuar dawn a, sipai dah tumna hmun hnuai mai, Durlui chu Balu lakna kai leh, Aizawl leh hmundang dang atanga pawl, chhungkua leh thian ho tam takin intihhlimna atana an hman thin a nih bawk avangin Sipai an awm chuan civil mi te leh sipai inkarah buaina a chhuak fo thei niin a sawi a. Sipai dah tumna hmun chu National Highway 54, Aizawl leh Silchar inkar Roadside Reserve area leh Tlawng Riverine Reserve a awm a nih thu a sawi a. Tuna Riverine Reserve chhunga mimal ram neih pawh sawrkar in a phal tawh loh laia ram zau tak, Tin 570 hmun lai mai phal taka pek an tum chu mak an tih thu a sawi a, Revenue leh Forest Department dan siam chu sawrkar bawkin a bawhchhia ah an ngaih thu a sawi a ni.

Aizawl-a Sipai Battalion khat awm pawh Mizo te'n hnawk an tih thu leh sawnchhuak tura an tih reng thu Sangkunga chuan sawiin, an Veng huamchhunga Battalion khat mai pawh ni lo, Battalion engemaw zat infinkhawm dah chu Civil mi in reilote ah chhan hrang hrang avangin an zo dawn lo niin a sawi a. Khaw mipui leh vangtlang duhlo chunga thuneitu zawk leh huai zawk, chak zawk nih avanga inbarhluih emaw intihluih chu a tha lo an tih thu sawiin, mi rilru tinatu leh mi rilru hliamtu nih chu a pawi tih sawiin, Democracy Principle kalh niin a sawi bawk.

Inrinni-a thuthar lakhawmtute an kawmnaah hian Sairang Dinthar-a Village Council, YMA, MUP leh MHIP te bakah Kolabari hmuna sipai dah duh lo pawl an din, Kolabari Ram Committee aiawhte an tel a ni.

Comments

Popular News (Last 30 Days)