Latest News

District hrang hrang zingah Champhai District in COVID-19 Vaccine an pe tha ber mek

Mizoram District hrang hranga mipui hriselna lama thawktu, Health Care Workers te COVID-19 hri danna pek mekah a pe tha ber chu Champhai District niin hri danna pek tur atanga zaa 73 hnenah Vaccine hi an pe tawh.

Chief Secretary, Lalnunmawia Chuaungo kaihhruaia State Steering Committee on COVID-19 Vaccination thutkhawm Zirtawpni tlai-a neih chuan vaccine pek chungchang hi an thlirho a, he huna tarlan a nih dan chuan tun dinhmunah hriselna lama thawktute hri danna pek thatna ber chu Champhai District a ni a, Kolasib District chuan hriselna lama thawktu zaa 33 hnenah vaccine pe tawhin Mizoram District zingah vaccine pe tlem ber an ni thung a. Mizoram District hrang hrangah hri danna pekchhuah hun hi vawi 189 neih a ni tawh a, hei hi chawhruala ni khata hmun 15 zela pek ang a ni a. COVID-19 Vaccine hi thawh khatnaah mi 16,380-in dawng thei tura ruahman a ni a, vaccine la zingah insawiselna nei mi 307 an awm a, Khawsik, Taksa na, Lu-na leh hri danna hmanga an chiuna laia na nei te an ni tlangpui tih tarlan a ni. COVID-19 hri danna hi a thawhkhatna ah dose 18,500 dawn a ni a, a thawh hnihna ah dose 16,500 leh a thawh thumna ah dose 30,400 dawng leh turin ruahmanna siam a ni.

He thutkhawmna-ah hian hri danna pek chungchang thupuangtu Dr. Lalzawmi chuan hri danna an sem chhuah lai a harsatna an tawhte tarlangin, Internet connection thalo te, CoWIN Portal chianglo te, Vaccine lak hlau te leh vaccine lak nghahlelh lutuk te chu an harsatna tawh tam ber a nih thu a sawi a. Hetihlai hian hri danna hi a tha thei ang ber leh indaihzai thei ang bera sem tuma hmalak a nih thu tarlangin, nitin-a hri venna sem dan Zoom biakhmuhtheih hmanga an sawiho thin thu te a sawi bawk a. Hri venna tihriral a tlem theih nana hriselna lama thawkte chu PHC leh hri danna an semna hmun hrang hranga an kohkhawm thin thu leh WHO, UNICEF leh UNDP te nena an thawhhona a that thu tarlan a ni bawk.

Sawrkar laipui ruahmanna angin hri do hmatawnga awm hri danna dawng turte chu State leh Central Police Department thawktute, Police silai keng chi, Home Guard, Civil Defence Organization, Disaster Management Volunteer, Municipal hnathawktu, Tan In leh kangthelh pawl hnathawktu leh PRI te an ni a. Mizoram chhunga hri do hmatawnga awm hri danna dawng tura inziaklut hi tun dinhmunah mi 27,557 an awm mek a. Heng hri danna pe tur hian hun leh hmun hrang 276 ni tura chhut a ni a, hri danna petu pawl mamawh zat chu pawl 70 ni tura chhut a ni bawk.

Comments

Chhiar Hlawhte