AMC-ah Direct Funding a theih loh - Dr. Thangtea

Health Minister leh MNF Adviser, Dr. R. Lalthangliana chuan Aizawl Municipal Corporation (AMC)-a eptu Party ten Direct Funding an tih fo chu a theih tak tak loh tih sawiin, State sawrkar kaltlanga tih a ngai zel a ni, a ti.

AMC inthlanna neih tura Inrinni-a hmun hrang hranga a campaign-na ah Dr. R. Lalthangliana chuan AMC chu MNF din leh fahrin a ni tih a sawi a, “Tunah chuan State-ah MNF kan sawrkar tawh a, khawpui tihhmasawn duh leh a tihhmasawn dan tur hria State-ah MNF a sawrkar ve ta a. AMC-ah pawh Rulling MNF Candidate-te ngei kan tihtlin a ngai a, MNF Candidate-te hi kan tihtlin chuan kan Ward theuhah hmasawnna a rawn lut tup tup mai dawn a ni,” a ti bawk.

Health Minister ni bawk Dr. R. Lalthangliana chuan COVID-19 chungchang pawh sawiin, hri kai nasa taka kan tlakhniam tak thu a sawi a, “Hei hi kan zavaia kan tanrual vang leh tawngtai mite tawngtaina rah a ni a, chapo thei leh inchhuang thei kan ni lo, kan chhuan ber tur chu Pathian chauh a ni,” a ti bawk.