Ruihhlo dona ah hmalak a tul

Ruihhlo dona ah hmalak a tul

Inrinni khan Serchhip Police te chuan Serchhip-ah Heroin No. 4 engemaw zat man lehin Pathianni zan khan Excise & Narcotics Department lam pawhin an man leh bawk a. Tunhnaiah Serchhip-ah ruihhlo man hi a khat tawkin a awm deuh reng ta mai a, ruihhlo in min luhchilh tawh zia hei hian chiang takin a tarlang a. Hetianga ruihhlo man a awm lai hian man loh chu a tam zawk a nih thei hial awm te tih ngaihdan a ni awm thei bawk a, hei vang hian Serchhip mipui, tlawmngai pawl leh Kohhran te thleng hian ruihhlo in kan thalaite-ah bu a khuar nasat zia hi kan hriata mutmawh hnarmawh-ah kan neih a tul tawh hle a ni.

Mizoram-a ruihhlo hmansualna a hluar tirh khan Serchhip-a kan kan thalaite zingah paawh ruihhlo ngawl vei leh nunna chan phah hial te pawh an awm a, amaherawh chu kan sawrkar leh tlawmngai pawl te hmalakna a taka hlawhtlinna hmuh tur awmin Serchhip chu ruihhlo hmansualna awm lohna angah ngaih hial a ni a. Amaherawh chu tunhnaiah hetianga Heroin No. 4 in min rawn luhchilh leh hnu hian kan thalaite zingah bu a khuar nghet leh tawh viau niin a lang a, ruihhlo ti leh zuar-a kan ngaih lo te pawh an inhnam-hnawih te fo mai a, chuvangin ruihhlo laka kan thalaite chhanchhuaka, a ti ve lo te veng tur hian hma kan lak nasat a tul hle a ni.

Thalaite hi kan hmalam hun atana kan ram leh Hnam innghahna an ni a, hetianga ruihhlo avanga harsatna an tawk a nih chuan kan ram leh hnam hmalam hi ngaihtuah ngam a ni lo. Chuvangin, he ruihhlo hian kan chhung-kua ala luhchilh ve lo a nih pawhin inthlahdah theih a ni lo tih hriain ruihhlo laka kan him theih nan hma kan lak a tul hle a ni.