Latest News

NH. 54 in Serchhip khawpui chhung a helna tur a hun taka zawh hman beisei a ni


National Highway-54 laihzauh leh siamthat hna thawh mekin Serchhip khawpui chhung a paltlang tawh dawn loh avanga a helna tur siam hna thawh chu chak taka chhunzawm mek zel niin huntiam chhuanga zawh hman ngei an inbeisei thu he hna thawktute chuan an sawi.

Cheng vbc. 153.1 seng-a NH. 54 in Serchhip khawpui a helna tur kawng siam hna thawh mek hi nimin khan Serchhip-a thuthar thehdarhtu thenkhat te chuan tlawhin he hna thawktu Kram Infracon Pvt. Ltd. a Project Manager, Ayush Tiwari chuan a dawnsawn bakah an hnathawh dan hrang hrangte a lo hrilhfiah a. He kawng thar siam hna hi nikum December 11 khan Kikawn atanga thawh tan niin hna tan atanga ni 15-na, December 26, 2020-ah Khawtetlang leh Sailiamkawn atangin hna thawh chhunzawm leh a ni a, he hna thawh tura tel, Chhiahtlang Hmar Veng atanga Chhiahtlang Kawn Veng-a chhuak tur kawng laih hna pawh January 20-ah thawh tan leh a ni bawk a, heng an hnathawhna hmun 4-ah hian khawl pahnih theuh dahin mi 50 velin hna an thawk mek tih sawiin, hnathawh hun chhung tura ruahman, thla 24 (kum 2) chhung chuan zawhfel ngei an inbeisei tih a sawi bawk.

Ruahman lawk dan chuan Serchhip khawpui chhung helna tur NH. 54 kawng laih thar hi Kikawn-ah pengin chhuah lamah Serchhip khua a hel dawn a, KM 11.829-a thui kawngpui thar laih tur niin Sailiamkawn-ah a chhuak dawn a, he Package-ah hian Chhiahtlang lamah pawh khawchhung helna tur KM 2.571-a thui laih thar a ni dawn bawk a, heng hmun pali-ah te hian ngawrh taka hna thawh niin Serchhip-ah hian KM 3.5 laih ni tawhin Chhiahtlang-ah hian KM 4 laih a ni tawh thung. He kawng thar hi meter 12-a zau tur niin kawngpui blacktop hi meter 10-a zau tur a ni a, blacktop bakah hian meter khat ve ve a sir tuak-ah awm tur a ni a. An hnathawh turah hian leilung awmdan an endik tel thu pawh hnathawktute chuan sawiin, hmun thenkhatah chuan kawngthlang leh chhak lamah a leilung in a zirloh chuan Retaining Wall rem anih dawn thu an sawi a. By-pass Road Kikawn peng atanga KM 10.7-ah hian Lei dawh a ni dawn tih hnathawktute chuan sawiin, Lei hi pahnih dawh tur a awm thu leh a sei zawk chu meter 151-a sei niin pakhat hi meter 15-a sei a nih dawn thu a sawi bawk.

Kram Infracon Pvt. Ltd. a Project Manager, Ayush Tiwari chuan hna an thawh tan atangin harsatna lian an tawklo tih sawiin, hri leng avanga harsatna erawh an neih thu a sawi a, mipui vantlang tlawhpawh loh-a hna thawk an nih avangin tluang takin hna an thawk thei tih sawiin, kawngpui thar turah hian PHE Department in Serchhip khawpui chawmna atana Tui an lakna Main Line kaltlang a awm avangin harsatna tawh erawh an neih thu a awm a, hei pawh hi Department lamin an enfiah tawh thu leh harsatna pawh chinfel theih ngei an beisei thu a sawi a, Chhiahtlang lamah kawngpui kaltlangna tura awm chhungkaw pakhat chhuak lo an la awm thu leh hei pawh hi thuneitute hnenah thlenin hma an lak mek thu a sawi bawk.

He an hnathawh mek hi tluang taka an zawhfel hunah sawrkar kut-ah an hlan tur thu pawh sawiin, hemi hnu hian kum 4 chhung an la enkawl zui tur thu pawh a sawi bawk.

Comments

Chhiar Hlawhte