PMGSY sum Vbc. 391.39 hup beh vangin contractor ten bill la thei lo - MPCC

Mizoram Pradesh Congress Committee (MPCC)-a an Media Department chuan Mizoram-a kawngpui laihna Scheme PMGSY hnuaiah Financial Year 2019-2020 atana sanction Vbc. 640 chu Mizoram sawrkarin dawng fel vek tawh mah se Vbc. 391.39 chu a hup beh tlat avangin Contractor-ten Bill an la thei lo niin an sawi.

MPCC Media Department Chairman Dr. Lallianchhunga chuan nimin khan Aizawl-a MPCC President Room, Congress Bhavan-ah chanchinthar lakhawmtute kawmin he thu hi a sawi a, Dr. Lallianchhunga chuan Mizorama kawngpui laihna Scheme, PMGSY hnuaiah harsatna nasa tak a thleng mek nia sawiin, Contractor-ten October 2020 atangin Bill an la thei tawh lo tih a sawi a. PMGSY pawisa reng reng chu 60% hman zawh a nih veleh Central sawrkarin 40% dang a rawn release chauh thin nia sawiin, Financial Year 2019-2020 atana sanction cheng vbc. 640 chu Mizoram sawrkarin a dawn fel vek tawh thu leh amaherawhchu March ni 31, 2020 thleng khan Mizoram State Finance Department chuan cheng vbc. 248.69 chiah MiRRDA (MiRRDA hi PMGSY enkawltu bik Agency) account-ah chhunglutin a dang zawng vbc. 391.39 chu a hup beh tlat avang leh a awmna chin hriat a nih tak loh avangin Contractor-ten bill an la thei lo niin a sawi.

Dr.Lallianchhunga chuan Congress sawrkarna hnuaiah Mizoram sum leh pai dinhmun a tha chho zel nia sawiin, beisei loh taka kum 2018 MLA Election-a a tla chung pawhin, MNF sawrkar thar kha sum leh pai (Surplus Budget) cheng nuai 50,000 chuang a hnutchhiah thei hial zawk niin a sawi a. Amaherawh chu RTI hmanga zawhna chhanna an dawn atangin Zoramthanga kaihhruai MNF sawrkar lai mekin sum harsatna a tawk nasa hle tih a lang tih sawiin, “An sawrkar tirh kum 2019-20 leh 2020-21 (kum hnih chhung lek) in ‘Ways and Means Advances’ atangin vawi sawmthum pakhat (31) RBI atangin sum a puk tawh a, chu chu cheng vbc. 512.80 a ni” a ti a, “Hei bakah hian RBI atang bawkin Special Drawing Facility an tih (a pung tam zawk) hmangin vawi sawm panga (15) lai mai a lo puk tawh bawk, chu chu cheng vbc 218.18 a ni,” a ti.

MPCC Media Department Chairman chuan RBI Treasury Bills Holdings chu State sawrkar sum leh pai dinhmun that leh thatloh hriatna pawimawh ber pakhat a ni tih sawiin, Congress sawrkar term tawp dawn lam kha chuan RBI a Mizoram sawrkar sum neih khan cheng vbc. 400 dawn te a han hawlh thin hial tih a sawi a. RTI chhanna atanga a lan danin MNF sawrkar hian December,2020 sawrkar hnathawk hlawh a pek lai Jan. ni 6,2021 khan RBI-a Mizoram sawrkar pawisa dah chu Rs. 0.0/- (nil) niin, engemaw ti ti in Jan. 13,2021 khan cheng vbc. 73.60-ah a lo chho ve leh a; mahse, hei pawh hi January,2021 thla sawrkar hnathawk hlawh pek a nih leh meuh chuan a zo leh vekin a rinawm tih a sawi bawk.

Dr. Lallianchhunga chuan, RTI chhanna atanga a lan danin Mizoram sawrkar leiba pawh MNF sawrkar kum 2 chhung lekin cheng vbc. 1000 velin a pung hman nia sawiin, hetianga leiba pung chak hi tunhmain Mizoram-ah a la awm ngailo tih a sawi a. Mizoram sawrkar leiba pun dan chu kum 2019-2020 ah vbc. 7771.08 leh kum 2020-2021-ah vbc. 8701.26 in a pung niin RTI Chhanna (dated 27th Jan, 2021) ah tarlan a ni, a ti bawk.