PMGSY sum chungchang PWD in sawifiah

Mizoram sawrkar-a PWD chuan thuchhuah siamin Mizoram chanchinbu hrang hrang leh Electronic Media lama PMGSY pawisa cheng vbc. 391.39 bo anga sawi leh tarlan chungchang chu a sawifiah.

Hemi chungchanga sawrkar thuchhuah chuan kum 2019-2020 chhunga State leh Central atanga sum hmuh Central atangin cheng vbc. 576.06 leh State atangin cheng vbc. 64.02, a vaiin cheng vbc. 640.08 atangin March 31, 2020 thleng khan cheng vbc. 248.69 chu MiRRDA Account a chhunluh a ni tih tarlangin, a bang cheng vbc. 391.39 chu chhunluh hman a nih loh avangin Deposit Account, D-III a dah a ni tih an tarlang a ni. D-III a dah atang hian kum 2020-21 chhungin cheng vbc. 156.94 chu hman a nih thu leh tun dinhmunah a bang cheng vbc. 234.45 chu hman turin release tura hma lak mek a ni tih an tarlang a. Cheng vbc. 391.39 bo anga sawi chu a bo ni lovin March 2020-ah Sawrkarah Challan hmanga Deposit thlap niin, heta tang hian cheng vbc. 156.94 phei chu 2020-21 kum chhung hian release a niin hman a ni tawh tih an sawi.

Ministry of Rural Development (MoRD) Guidelines-ah kum thar hlim-a Opening Balance atanga 60% kan hman hnuah Utilisation Certificate siamin Sanction thar a dawn theih a nih thu leh, hemi kum vek pawh hian a bang 40% leh release thar te belhkhawm atanga 60% hman leh a nih chuan Utilisation Certificate siamin Sanction thar a dil leh theih bawk tih tarlangin, kum 2020-21 kum tira balance hi cheng vbc. 404.09 a ni a, heta tang hian kum 2020-21 chhung hian cheng vbc. 228.53 hman a ni tawhin 60% kan la hman tlin lohna hi cheng vbc. 13.93 a ni a. Kumtir-a kan balance atanga 60% kan la hman tlin loh avangin 2020-21 chhung hian Central Sanction kan la hmu lo tih an tarlang bawk.

PWD thuchhuah chuan Contractor ten October atanga bill an la theilo nia sawi chungchang pawh sawifiahin, Bill hi pek reng a ni tih an sawi a. Kum 2020-21 chhunga Contractor hnen a bill pek dan pawh tarlangin April 2020-ah cheng vbc. 11.98; May 2020-ah cheng vbc. 37.02; June 2020-ah cheng vbc. 24.09; July 2020-ah cheng vbc. 18.09; August 2020-ah cheng vbc. 16.91; September 2020-ah cheng vbc. 23.91; October 2020-ah cheng vbc. 28.91; November 2020-ah cheng vbc. 22.40; December 2020-ah cheng vbc. 34.63 leh January 2021-ah cheng vbc. 10.59 pek a nih thu an tarlang bawk.