Latest News

PMGSY sum hmanga Mizoram kawng siamah lungawina tur a vang tih Central YMA in an sawi

PMGSY sum hmanga Mizoram kawng siam mek kalpui a nih danah Central YMA chuan lungawina tur a vang hle niin an sawi.

Central YMA hruaitute chuan nimin khan an President, Vanlalruata hovin Central YMA Committee Room-ah chanchinthar lakhawmtute an kawm a, kum 2017-a YMA General Conference, Champhai Zotlang-a neih ah 'Mizoram hmun hrang hranga inkalpawhna kan neihte hi tun aia tha leh changtlung zawka siam a nih theih nan Central YMA in hma la rawh se' tia a lo pawm tawh chu an bawhzui dan sawiin, January ni 13, 2021 khan Group 5-ah inthenin Mizoram chhunga kawng siam mek hmun 16 a mi chu an tlawh kual a, heng an tlawhkuala hnathawh mekte chu a beidawnthlakin, hnathawh mumal hmuh tur leh hmanrua pawh dah lemlote an nih thu an sawi a. Contractor hna hmutute’n thawk lova, hming hawha thawktute leh hna hralh chingte avangin hna zawh hunah zawh theih a nih loh thu leh hmun tam takah thawh zawh ni si lova, kawng siamna sum lokal a riral mai mai a hlauhawm hle niin an sawi.

Central YMA President Vanlalruata chuan, kawng siam hna thawh mek te hi hun rei tak an lo kalpui tawh thu leh PWD te nen pawh tum engemawzat sawi ho ni tawh mah se, thil zawng zawng an la tihfello tih a chiang reng niin a sawi a. “Vawiina kan thupui ber chu, 'kan nawi ta hle mai' tih hi a ni a. A manganthlak a. Kawng khan that ngaihna leh hnathawh zawh hun turah zawh ngaihna a awm lo tih hi kan ngaihdan deuh chu a ni,” a ti. Tuna kawng siam mek an enfiah hi chu 'Sample Survey' ang chauh a nih thu sawiin, Hnathawh that chu sawi loh, hnathawhna hmunah hmanrua inchhawp pawh an tlem hle laiin, Prime Minister Narendra Modi-a'n PMGSY hi March 2021-ah huntiam a ruat avang hian kawng siam mek hnathawh zawh loh a nih dawn chuan an tawpsan tawp dawn nge tih hi sawi theih a nih loh avangin manganthlak a tih thu a sawi.

Central YMA General Secretary Prof. Lalnuntluanga chuan, “PMGSY hnuaia Contractor kawng siam tura chhangtu te'n an chhan ang ngei a an thawklo hi a lungchhiat thlak hle a. Hna duh si, a taka thawk tha duh silo te hi kan dem tak zet a. Hnathawh mumal awm si lo a, hnathawhna tur sum (running bill) la thei reng kan awm maite, hnathawh zawh hun tawh a thawk zo si lo, hun pawhsei sak an ni fo leh thawhna tur sum ruahman siam danglam a ni fote hi tha kan ti lo hle a ni,” a ti a. “Kum khat velte an thawk lo thin hi chu hriatthiamna chen pawh a awm thei a, chutiang pawh ni lo, kum hnihna ah pawh hmalakna awm miahlo te hi chu a rilru nat thlak hle a ni,” a ti bawk.

Comments

Chhiar Hlawhte