P&E Minister in Bairabi Zophai tlawhin buaina thleng-a hliam tuar te a tlawh bawk

Power & Electricity Minister, R. Lalzirliana chuan nimin zing khan Bairabi Zophai-a ramri lui tlawhin ramri-a buaina thleng avanga P&E Department-a thawktu hliam tuarte leh khaw tual mi hliam tuar, Bairabi PHC-a enkawl mek te chu a tlawh nghal bawk.

P&E Minister, R. Lalzirliana chuan Ramri lui, Zophai pel-a Assam lamin kawng an lo laih phei chu a hmunah kalin a endik a, ramri cheithat chu Sawrkarin a ngaih pawimawh thu sawiin, Electric ban phun pheina turin hmalak thuai tur a nih thu a sawi a. Ramri lui hnaih a Duty Post siam leh kawng thawmthat hna thawh vat a tul thu a sawi bawk. Assam lamin a ramri pel a kawng an laih chu ram-pawn atanga dan lova Assam ram-a lut ru-a Mizoram hnaiha inkhuar tumte hmatheh-a mi thenkhat politics khelhna hmanrua nia a lan thu leh hetiang hmalakna hi thleng nawn tawh lo se a duh thu a sawi a, he hmalakna avanga buaina chhuak chu pawi a tih thu a sawi bawk.

Zophai-a IR Post pawh P&E Minister hian tlawhin duty-te fuihna thu a sawi a, min thlahtute ram lo sualchhuah sa venhim chu a ram neitute mawhphurna a nih rualin hemi kawnga pawimawh hmasa berte chu ramri-a duty mek Mizoram Police-te chu an nih thu a sawi a. An hna chu huaisen tak a kalpui thin tur leh ram leh hnam humhim hna a nih angin rinawm tak leh inpekna thinlung puchunga an hna thawk thin turin a chah a. IR Post Zophai a thawktute mamawha hman tur Rs. 10,000/- a hlan nghal bawk.

Zophai ramri bula buaina chhuak avanga hliam tuarte tlawhin, Ram leh hnam tan a mi inpe, thian chhan thih ngam leh zonun zemawi tlawm-ngaihna tilanga thawkchhuak mi chhuanawm tak an nih thu a sawi bawk. Heng hmun a tlawhna ah hian Minister hi Assembly Deputy Speaker, Er. Lalrinawma bakah MLA dangte leh sawrkar mi pawimawh ten an tawiawm a ni.