Ni 2 chhungin hri kai thar 4 leh dam 4 an awm

Ni 2 chhungin Mizoram-ah COVID-19 hri kai mi 4 hmuhchhuah leh niin ni 2 chhungin hri kai mi 4 enkawl dam an ni bawk.

Zirtawpni khan Mizoram-ah Sample enfiah 1291 atangin COVID-19 hri kai mi pahnih hmuh an ni a, District hrang hranga TrueNat Laboratory-a Sample 14 enfiah atangin Champhai District-ah hri kai pakhat hmuhchhuah a ni a, tualchhung-a hri inkaichhawng a ni. Rapid Antigen Test hmanga Sample enfiah 1213 atangin hri kai pakhat hmuh a ni bawk a, Lunglei District-ah zirlai naupang Hostel-a luh dawn avanga Sample enfiah atanga hri kai a ni bawk. Zirtawpni khan ZMC Laboratory-ah Sample 64 enfiah niin hri kai hmuhchhuah an awmlo thung a ni.

Inrinni khan Mizoram-ah Sample 640 enfiah niin heng atang hian hri kai mi pahnih hmuh leh an ni bawk a, District hrang hrang TrueNat Laboratory-a Sample enfiah 2 niin heng te hi Champhai District-ah niin an pahnih hian hri an kai tih hmuhchhuah a ni a, heng mite hi nufa niin fanu School a luh dawn avanga Sample enfiah ah hri a kai tih hmuhchhuah niin a nu hi en ve leh nghal niin hri a kai tih hmuhchhuah a ni ve leh bawk a ni. Inrinni khan ZMC Laboratory-ah Sample 68 enfiah niin Rapid Antigen Test hmangin Sample 570 enfiah a ni bawk a, hri kai hmuh erawh an awmlo thung a ni.

Inrinni khan Mizoram-a COVID-19 hri kai mi 4 te chu enkawl dam niin hri kai enkawlna hmun atanga chhuahtir an ni a, nimin-ah erawh enkawl dam an awm belh lo thung a. Heti hian nimin tlai dar 5:00 thleng khan Mizoram-ah COVID-19 hri kai hmuhchhuah chu 4409 niin heng zinga 4377 te chu enkawl dam an ni tawh a, hri kai hmuh atanga za zela 99.27te chu enkawl dam ni tawhin hri kai enkawllai 22 an la awm a, hri kai zingah nunna chan mi 10 an awm tawh bawk a ni.

Mizoram District 11 zingah tun dinhmunah hri kai enkawllai nei District 5 awmin District 6-ah chuan hri kai enkawl an awm lo a, tunah hian Lawngtlai District chu hri kai enkawllai tamna ber ni mekin mi 7 enkawl mek an ni a, thla 8 vel zet hnuah Aizawl District chu hri kai enkawllai tam berna a ni lo ta a ni. Tun dinhmunah Aizawl District-ah hian hri kai enkawllai mi 6 an la awm mek a, Champhai District-ah mi 5 enkawllai la awmin Lunglei District-ah mi 3 leh Saitual District-ah mi pakhat enkawl mek a. Siaha, Kolasib, Serchhip, Mamit, Khawzawl leh Hnahthial District-ah te chuan hri kai enkawllai an awm tawhlo a ni.

India ramah nimin thleng khan hri kai hmuhchhuah zawng zawng chu 1,09,91,651 an tling tawh a, an zinga 1,06,89,715 te chu enkawl dam niin hri kai enkawllai 1,45,634 an la awm mek a, nunna chan 1,56,302 an awm tawh bawk a, mi 1,10,85,173 te hri danna pek an ni tawh bawk.