Latest News

MPF in AMC inthlanna ah Party leh mipuite ngen

Mizoram Peoples Forum (MPF) chuan AMC inthlanna neih turah Candidate pakhat tana sum sen tur zat a bithliah, cheng nuai khat aia tam seng lo turin party hrang hrang an ngen tih an sawi.

Nimin a Aizawl Press Club-a thuthar lakhawmtute an kawmna-ah MPF President, Rev. Dr. C. Lalhlira chuan party tin leh worker-te, candidate-te, MPF duty-te leh mipui (Voters)-te an thuchhuah ngaipawimawha zawm theuh turin MPF General Headquarters chuan a ngen tih a sawi a. Sum leh therhlo dang hmanga vote lei leh hralh chu Election danin a phal loh avangin mimal leh pawlho pawhin candidate-te hnenah thilphut nei lo tur leh Election Model Code of Conduct zah turin a sawm bawk.

Rev. Dr. C.Lalhlira chuan candidate tan House to House campaign phal anih thu leh mi pali thleng an hruai theih thu sawiin, Party Member-te candidate tel lova campaign erawh phal a ni lo tih a sawi a. Campaign-na ah mimal inbeihna nei lovin Policy leh Manifesto hmanga campaign mai nise a ti a. Media hmanga inbeih leh insawichhiat chu tih loh nise tiin Social Media hmanga diklo taka thu thehdarh chu Danin a khap leh thehdarhtute chu na taka hrem theih an nih avangin ti lo turin a chah bawk a ni.

MPF President chuan Zu leh ruihhlo hmanga vote zawn chu Election Commission phal loh anih avangin tih hauh loh tur a ni tiin Polling Area bul hnaiah Zu leh ruihtheih thil-in a tihbuai mekte awm phal a ni lo tih a sawi a. Vote nei zawng zawngten zalen taka vote an thlak theuh theihnan tan la theuh turin an ngen tih a sawi.

Rev. Dr. C. Lalhlira chuan dan dinglai angin tuman Polling Booth chhungah Mobile Phone kenluh loh tur a ni tih sawiin, hemi atana mawhphur turin MPF Duty emaw, Force mite emaw inruat nise an duh tih a sawi a. Model Code of Conduct bawhchhia leh an thuthlung bawhchhia te chu finfiah ngei a nih chuan MPF-in an bawhchhiatna Constituency/Ward huam chhung mai bakah a tul angin puanzar anih tur thu a sawi a. Vote nei zawng zawngte chu vote thlak theuh turin an sawm nawn tih a sawi bawk.

Comments

Chhiar Hlawhte