Mizoram State Day vawi 35-na Mizoram hmun hrang hrangah lawm a ni

Mizoram State Day vawi 35-na chu Inrinni khan Mizoram-ah urhsun taka hman niin Serchhip-ah pawh District Bawrhsap, Kumar Abhishek IAS hovin hman a ni a. Aizawl-ah chuan Mizoram Larsap, PS. Sreedharan hovin Mizoram State Day lawmna hi neih a ni.

Serchhip-a Mizoram State Day lawmna puala inkhawm Serchhip DC’s Conference Hall-a neih ah hian Bawrhsap chuan Mizoram chuan hun rei tak rambuai a tuar tih sawiin, kum 1986 ah inremna lo awmin chuta chin chu Vawiin thlengin State ralmuang leh hmun him ber te zinga mi a lo ni ta zawk a. State dinhmunah hlankaia awmin hmasawnna leh inrelbawlna kawngah State dang tam takte tan pawha entawn tlak khawpin hma a lo sawn ta a ni, a ti. Bawrhsap chuan, ziak leh chhiar thiam tam lamah te, faina leh thianghlimna lamah te leh thil tam takah State dangte tana entawn tlakin Mizoram chuan hna a thawk tih sawiin, hmasawnna kawng dangah pawh kan thangduang em em a, heng zawng zawng hi remna leh muanna kan neih vang te, mipuite zingah inunauna tha a awm tlat vangte a ni, a ti a. Zirna lamah te, Skill Development lamah te, Tourism lamah te leh kawng dang tam takah hmasawn theihna thil tam tak kan la nei a ni, a ti bawk. Khuallian chuan, he huna tel tur sawm Head of Offices te, chanchinbumite leh tlawmngai pawl aiawhte chu midangte entawntlaka nunga, a tha zawnga thil thlak thlengtu nih tum tlat tura chahin, remna leh muanna te, inunauna tha te a awm zel theihna atana palai ni tlat turte in a chah bawk a ni.

Mizoram State Day puala inkhawm hi Serchhip Addl. DC, Lalmuansanga Ralte chuan kaihruaiin Govt. Serchhip College-a Asst. Professor (Political Science), Dr. Zarzosanga chuan Mizoram in ram rorelna lama ke a chheh tawh dan tlangpui leh kan hmabak awm thei nia a hriatte a sawi bawk. Mizoram State Day, 2021 lawmnaah hian Thenzawl SDO (C), Kulothungan, IAS leh Serchhip-a Head of Offices te, tlawmngai pawl aiawhte leh chanchinbu mite an tel a ni.

Mizoram State Day lawmna pui ber hi Aizawl-a Vanapa Hall-ah Mizoram Governor, Mizoram Governor, PS. Sreedharan hovin neih a ni a, he hunah hian Larsap chuan Mizoram mipuite State Day chibai bukin, he ni pawimawh takah hian Mizoram chu kawng engkima State hmasawn tak ni tura a duhsak thu a sawi a. Ram zalen tur chuan ram inrelbawlna lama zalenna mai a tawklo a ni tiin, ei leh bar, economy lama zalenna, midanga innghat lo a awm theih leh khaw-tlang nun a zalenna a keng tel tur a ni, a ti a. Chumi a nih avang chuan intodelh a pawimawh hle thu leh, sawrkar laipui pawhin intodelhna kawngah hian hma la in, state tin te pawh theihtawp chhuah tura a duh thu a sawi bawk.

He hunah hian Chief Minister, Zoram-thanga chuan State Day ni lawmawm tak hman a ni leh thei chu lawmawm a tih thu sawiin, “State inrelbawlna puitling nei thei tura harsatna tam tak paltlanga nunna hial chânte an lo awm tawh zia hre reng chungin State Day hlutna hi mipuiin kan hriatchian thar leh a pawimawh hle a ni,” a ti a. Mizoram chu State thangduang, hausa leh entawn-tlak a siam chu kan mawh a nih thu sawiin Chief Minister chuan, intodelh chu kan hmabak lian ber zinga mi a ni, a ti a. State hausakna te hi hmang tangkaia remhriatna nen theihtawp chhuah tura mipui sawmin, sawrkar chauha innghat lova Kohhran, tlawmngai pawl leh mipui thawhhona tha kan nei zel chu lawmawm a tih thu a sawi bawk.

Mizoram State Day lawmna hi District khawpui hrang hrangah pawh neih niin District Bawrhsap hova hman a ni a, District thenkhat ah erawh chuan Minister leh MLA ten an hmanpui bawk a ni.