Mizoram-ah hri kai thar 1 awmin dam thar an awmlo

Niminpiah khan Mizoram-ah Sample 969 enfiah niin COVID-19 hri kai mi pakhat hmuhchhuah belh leh a ni a, tualchhung-a hri inkaichhawng a ni.

Niminpiah a hri kai hmuh thar hi Rapid Antigen Test hmanga Sample enfiah 910 te atanga hmuh niin amah hi Aizawl Chhinga Veng ami a ni a, bungrua sem kual thin niin Private damdawi In pakhat-a inentir tura kal, Screening Point-a enfiahna ah hri a kai tih hmuhchhuah niin hri kai lanchhuahna a nei lova, hri a kaina chhui mek a ni. Niminpiah khan ZMC Laboratory-ah Sample 45 enfiah niin District hrang hranga TrueNat Laboratory-ah Sample 14 enfiah a ni bawk a, heng atang hian hri kai hmuh erawh an awmlo thung.

Nimin khan Mizoram-ah hri kai enkawl dam an awm belh lo a, heti hian nimin tlai dar 5:00 thleng khan Mizoram-a hri kai hmuhchhuah chu 4410 niin an zinga 4379 te chu enkawl dam an ni tawh a, hri kai hmuhchhuah atanga za zela 99.29 te chu enkawl dam ni tawhin tunah hian hri kai enkawllai 21 an la awm a, hri kai zingah nunna chan mi 10 an awm tawh bawk a ni.

Hetihlai hian India rama COVID-19 hri kai enkawllai chu 1,47,306 an a ni mek a, Ministry of Health & Family Welfare chhinchhiah danin India rama hri kai hmuhchhuah hi 1,10,16,434 ni tawhin heng zinga 1,07,12,665 te chu enkawl dam an ni tawh a ni. Nimin thleng khan mi 1,17,45,552 te hnenah hri danna pek a ni tawh bawk.