Kangmei laka fimkhur inzirtir zel nise

Kangmei laka fimkhur inzirtir zel nise

Khua a Thal chho mek a, kumdang ang bawkin kangmei hlauhawm zual hun a ni leh mek a. Lo leh huan/leipui nei tur ten an Lo leh huan tur vah te an hal hun a ni mek a, mitin te kangmei laka kan fimkhur zual a pawimawh hle mai a. Chutihrual chuan kan hun kal tawh thlirin Lo/hal hun chhung ai mah hian a hnu lamah kangmei leh ramkang te avanga harsatna kan tawh hi a nasa zawk fo thin niin a lang a. Hei vang hian mitin ten tun aia nasa zawkin kangmei tichhuak thei thil laka kan fimkhur a tul a ni.

Mizoram sawrkar chuan kangmei laka kan him theihna tur hian Lo leh huan nei tur tan pawh a hal hun tur a bithliah thin a, hei hi a nawlpuite chuan zawmin Lo leh huan an hal dawnah pawh meilam te tha taka sialin fimkhur takin an hal thin a. Amaherawh chu Lo hal hun liam hnu, tih tur pawimawh em em nei lemlo te pawhin lui leh ramhnuai kan kal hun a lo thlen hian chhan hriatchian loh a ramkang te pawh hi a awm fo thin niin a lang a, hei vang hian ram lama chetla ngai lemlo te thleng hian kangmei laka fimkhur tura inzirtirna neih hi a tul hle a ni.

Ram kang hi eng vang pawha thleng nise a nghawng leh mihringte tana harsatna a thlen chu a inang reng mai a, hei vang hian mipuite hi kangmei tichhuak thei laka fimkhur tura kan inzirtir nasat a tul hle mai a. Thal khawlum hun, intihlimna te nei-a mi tam tak ram lam leh lui lam-a kan kal leh hun tur lo thleng turah hian kangmei tichhuak thei laka fimkhur tura inzirtirna hi chhungkua leh khawtlang ah theihtawp chhuaha kan kalpui a tul hle mai a, ram lam-a mei kan chhem, tihlum mumal lova kan kalsan fo thin te pawh hi kangmei tichhuaktu a ni fo thin tih te hi i hre reng ang u.