Mizoram-ah hri kai pakhat hmuh belh leh a ni

Pathianni-a Mizoram-a Sample enfiahte atangin COVID-19 hri kai mi pakhat hmuhchhuah niin nimin khan hri kai mi 3 te chu enkawl dam leh an ni.

Niminpiah Pathianni khan Mizoram-ah Sample 555 enfiah leh niin heng atang hian hri kai mi pakhat hmuhchhuah leh a ni bawk a, hri kai hmuhchhuah hi Rapid Antigen Test hmanga Sample enfiah 530 atang hmuhchhuah niin inkhawm bang a ke a zawi thut avanga damdawi In-a kalpui niin a Sample enfiah sak a nih hnuah hri a kai tih hmuhchhuah a ni ta a ni. Niminpiah khan ZMC Laboratory-ah Sample enfiah awm lovin District hrang hranga TrueNat Laboratory-ah Sample 25 enfiah niin hri kai hmuhchhuah an awmlo thung a ni.

Mizoram-a COVID-19 hri kai enkawl mi 3 te chu nimin khan hri lakah fihlimin anmahni enkawlna hmun atanga chhuahtir leh an ni a, heti hian nimin tlai dar 5:00 thleng khan Mizoram-ah COVID-19 hri kai hmuhchhuah chu 4383 ni tawhin an zinga 4353 te chu enkawl dam an ni tawh a, hri kai hmuhchhuah atanga za zela 99.31 te chu enkawl dam ni tawhin tunah hian hri kai enkawllai 21 an la awm mek a, hri kai zingah nunna chan mi 9 an awm tawh bawk a ni.