Latest News

CM hovin PWD hotute leh YMA hruaitute inkawm

Chief Minister Zoramthanga hovin nimin khan Central YMA hruaitute leh PWD hotute chu thukhawmin Mizoram chhunga kawng siam mek te Central YMA in an endikna-a an thil hmuh te leh hmalak ngaite an sawiho.

Chief Minister Office Cabinet Meeting Room-a he thutkhawm ah hian Central YMA ten PWD te nen an thawhhona dungzuia Mizoram chhunga kawngsiam endika hma an lakna chu Chief Minister chuan lawmawm a tih thu a sawi a. Mizoram leh a chhunga chengte tana tangkai tur kawng tha kan neih theih nan YMA chauh nilovin khawtlang leh mipuiin theihtawp chhuaha kan theihna zawn theuhva hma kan la chu thil lawmawm tak a nih thu Chief Minister chuan sawiin, thahnemngai taka sawrkar hmalaknaah thawhpui zui zel turin a sawm bawk a ni.

Sawrkar thuchhuah tarlan danin Pradhan Mantri Gram Sadak Yojana (PMGSY) hnuaia kawng siam Central YMA ten an endik chungchangah a tlangpui thuin harsatna awm anga lang chu Contractor atanga hna in pekchhawn tam lutuk avang niin a lang a. Hetiang thil hi a thlen tawh loh nan PWD in contract a lo sign pui te chuan an hna chin tha taka specification anga thawk zo tura hrilh an ni a. Chutiang a nih loh chuan contractor te hi 'blacklist' in, Mizoram sawrkar hnuaia hna engmah thawk thei tawhlo a chhinchhiah an nih tawh tur thu he hunah hian sawilan a ni.

Comments

Chhiar Hlawhte