Mizoram-ah hri kai mi 4 hmuh belh leh an ni

Niminpiah khan Mizoram-ah Sample 1314 enfiah niin heng atang hian COVID-19 hri kai mi 4 hmuh belh leh an ni a, an zinga mi pathum te chu hri kaina chhui zui ngai an ni.

Niminpiah-a hri kai hmuhchhuah te hi Rapid Antigen Test hmanga Sample enfiah 1143 te atanga hmuh te vek an ni a, Aizawl Mission Vengthlang-a hmeichhe naupang pakhat chu damdawi In-ah zai a nih dawn avanga a Sample enfiah ah hri a kai tih hmuhchhuah niin Dawrpui-a mi pakhat chu Rescue Home-a dah a nih dawn avanga a Sample enfiah ah hri a kai tih hmuhchhuah a ni bawk a, Bawngkawn Shalom-ah naupang pakhat chu a khua a sik avanga enfiah a nih hnuah hri a kai tih hmuhchhuah niin an vai hian hri an kaina hriatloh leh chhui ngai vek an ni a. Lunglei-ah tunhnaia Myanmar atanga rawn haw pakhat chu hri a kai tih hmuhchhuah a ni bawk.

Niminpiah khan ZMC Laboratory-ah Sample 81 enfiah niin hri kai hmuhchhuah an awmlo a, District hrang hranga TrueNat Laboratory-ah Sample 90 enfiah niin hri kai hmuhchhuah an awmlo bawk a ni.

Heti hian nimin tlai dar 5:00 thleng khan Mizoram-ah COVID-19 hri kai hmuhchhuah chu 4380 an ting ta a, nimin khan hri kai enkawl mi 3 te chu hri lakah fihlimin anmahni enkawlna hmun atanga chhuahtir leh an ni bawk a, Mizoram-a hri kai hmuhchhuah zingah mi 4345 te chu enkawl dam ni tawhin hei hi hri kai hmuhchhuah atangin zaa 99.20 niin tunah hian hri kai enkawllai 26 an la awm mek a, hri kai zingah nunna chan mi 9 an awm tawh bawk a ni.