Mizoram-ah hri kai enkawllai an tlem zel

Zirtawpni leh Inrinni-a Sample enfiah te atangin Mizoram-ah COVID-19 hri kai mi pakhat ve ve hmuhchhuah an ni.

Zirtawpni khan Mizoram-ah Sample 1577 enfiah niin heng atang hian COVID-19 hri kai pakhat hmuh a ni a, hri kai hmuhchhuah hi ZMC Laboratory-a Sample enfiah 86 atanga hmuhchhuah niin BSF Sipai, tunhnaia State pawn atanga rawn lut leh inkhunghranna hmuna awmlai a ni a, District hrang hrang TrueNat Laboratory-a Sample enfiah 35 zingah hri kai hmuhchhuah awm lovin Rapid Antigen Test hmanga Sample enfiah 1456-ah hri kai hmuhchhuah an awmlo bawk.

Inrinni khan Mizoram-ah Sample 466 enfiah leh niin heng atang hian hri kai mi pakhat hmuh leh a ni bawk a, hri kai hmuhchhuah hi Rapid Antigen Test hmanga Sample enfiah 364 atanga hmuhchhuah niin Aizawl College Veng-a hmeichhia niin College a luh dawn avanga Sample enfiahna ah hri a kai tih hmuhchhuah a ni a, District hrang hrang TrueNat Laboratory-a Sample enfiah 23 leh ZMC Laboratory-a Sample enfiah 79-ah hri kai hmuhchhuah an awmlo thung a ni.

Mizoram-a hri kai enkawl te zingah Inrinni khan mi 5 te chu enkawl dam niin nimin khan enkawl dam an awm belh lo thung a. Heti hian nimin tlai dar 5:00 thleng khan Mizoram-a hri kai hmuhchhuah chu 4382 niin an zinga 4350 te chu enkawl dam an ni tawh a, hri kai hmuh-chhuah atanga za zela 99.26 te chu enkawl dam ni tawhin tunah hian hri kai enkawllai 23 an la awm mek a, hri kai zingah nunna chan mi 9 an awm tawh bawk a ni.