Latest News

Chanchin thar thenkhat :

CLP Leader in zahthlak ti

MPCC Treasurer leh Congress Legislature Party Leader, Zodintluanga chuan MNF sawrkar in AMC chungchanga tha thawhtu leh thahnem ngai tak anga a insawi chu a zahthlak tih AMC Ward No. XIV Campaign Kick Off, Mission Vengthlang Kawn-a Inrinni-a neih ah a sawi a. Zodintluanga chuan MNF sawrkar chuan AMC tana pawimawh Mizoram State Finance Commission pawh a din duh lo nia sawiin, hei vang hian sum leh pai-ah AMC leh State-in harsatna a tawh phah niin a sawi a. Chief Minister leh a Minister ten inthlan puan hnua Veng hrang hranga infiamna hmun tur hmun Vote zawnna atana ram an zawng der chu Election Commission Model Code of Conduct Rules bawhchhiatna a nih thu a sawi bawk.


CDC, Mizoram hawn a ni

Naupang leh tleirawl zinga taksa leh rilru lama harsatna neite a bik taka enkawl theihna tura din, Child Development Centre, Mizoram (CDC) chu Inrinni khan Aizawl Dawrpui-ah hawngin Synod Moderator Rev. Dr. C. Lalhlira chuan Pathian hnenah hlanna a nei a. He Centre enkawl tur hian heng lama thiamna nei bik - Doctor, Clinical Psychologist, Occupational Therapist, Physiotherapist leh Speech Therapist te an awm dawn a ni.


Inrinni zan-ah In 2 kang

Inrinni zan dar 6:30 vel khan Bilkhawthlir Keicham-a Thangkimi In, Chhuanawma te chhung-kua (member 7) te chennna chu a kang a, bungrua engmah chuh hman a ni lo. Kangmei chhuah lai hian In-ah awm an awmloh avangin kangmei chhuah chhan chiang taka hriat a ni lo a, mihring thi leh hliam an awm lo bawk.

Inrinni zan vek khan Champhai District Bungzung khua a Upa Rolawmawma In, Assam Type chu a kang bawk a, bungrua engmah chuh hman a nilo bawk. He In-ah hian In neitute nupa khawsa in bungrua engmah chuh hman a ni lo a, kangmei chhuah chhan hriatchian a nilo bawk.


ZPM Thalai ten campaign nei

ZPM Thalaite chuan AMC inthlanna neih tur atan Aizawl khawpui hmun hrang hrangah Street Campaign an nei chho mek a, Street Campaign hi Veng hrang hrang hmun 43-ah neih tawh niin Inrinni khan Ward 4-a hmun 12-ah hun hman leh a ni bawk. Heng Street Campaign an neihna ah te hian ZPM-in AMC-ah sawrkarna a chan chuan miretheite thleng phâk sawrkar din anih tur thu sawiin, ZPM in kalphung thar a kalpui theih leh theihloh AMC inthlan hmanga enchhin turin mipuite an sawm bawk a ni.


Zirlai titha chawimawi

MZP Hqrs. Thenzawl chuan Inrinni khan Thenzawl-a Vantawng Group YMA Run-ah zirlai titha chawimawina hun an buatsaih a, he hun hi Zofa Run Construction-a Managing Director, Michael Chhakchhuak chuan khual-lian niin a hmanpui a ni. Zirlai titha chawimawina hunah hian Under Graduate leh Post Graduate-a First  Division leh Distinction-a passed zirlai 16 hnenah chawimawina hlan niin Mizoram pum-a top T0-a langte hnenah Special Award hlan an ni bawk. 

Comments

Chhiar Hlawhte