Latest News

Mizoram-ah HIV+ 23,092 hmuhchhuah an ni tawh

Mizoram-ah kum 1990 atanga kum kal mek, 2000-2021 thleng in HIV+ hmuhchhuah mi 23,092 an awm tawh a. Hetihlai hian tunhnai kum 15 (2006-21) chhungin HIV/AIDS vanga thi mi 2,877 zet an awm hman bawk.

Mizoram State AIDS Control Society (MSACS) chhinchhiah danin, kum kal mek 2020-21 chhunga Mizoram-a thisen endik tawh 15,843 atangin HIV+ hmuhchhuah 885 an awm a, hei hi thisen endik atanga zaa 5.6 a tling a. Hemi kum chhung vek hian nu naupai thisen endik 8,593 atangin HIV+ 77 awmin hei hi zaa 0.9 a ni bawk.

HIV+ hmuhchhuah zingah hian kum 25-34 inkar an tam ber a, mipa 6,396 leh hmeichhia 2,600, an vaiin mi 8,996 an tling a, hei hi HIV+ hmuhchhuah zawng zawng atangin zaa 42.59 a ni. Kum 35-49 ah HIV+ hmuhchhuah mipa 3,519 leh hmeichhia 2,075, an vaiin 5,594 (26.49%) awm bawkin, kum 15-24 inkarah HIV+ mipa 3,193 leh hmeichhia 1,584, an vaiin mi 4,777 (22.62%) an awm a. Kum 50 chunglam-ah mipa 725 leh hmeichhia 403, an vaiin mi 1,128 (5.34%) an awm a, kum 14 hnuailam mipa 308 leh hmeichhia 317, an vaiin mi 625 (2.96%) HIV+ hmuhchhuah an awm.

MSACS Project Director, Dr. Lalthlengliani chuan, HIV/ AIDS chungchanga mahni dinhmun inhriat chu huaisenna a ni tih sawiin, chu chu chhungte himna tur niin a sawi bawk.

Comments

Chhiar Hlawhte