Latest News

Bairabi leh Sairang inkar Rel kawng siam hna March 2023-ah zo hman tura ruahman a ni

Bairabi leh Sairang inkar-a Rel kawng lian chi, Broad Guage siam hna thawh mek chu hri leng avanga hnathawh a khaihlak avangin March, 2023-a zawh hman tura ruahman a ni a. Tunah hian hnathawh tur tam tak chu zawhfel a ni tawh bawk a ni.

Bairabi leh Sairang inkar-a Rel kawng siam hna thawh mek hi kar kalta khan North East Frontier (NF) Railway-a an hotu HS. Yadav, CAO leh Vinod Kumar, Chief Engineer (Construction)-te chuan a hmunah kalin hnathawh dan an enfiah a, Railway Consultant Hrangtawna IRTS (Rtd) chuan KM 51.38-a thui Bairabi - Sairang Rel kawng siam hna hi COVID-19 hripui leng vanga hnathawh a khaihlak hnuah tun dinhmunah a pangngai angin hnathawh chhunzawm leh a ni tawh tih sawiin, Bairabi - Sairang Rel kawng siam hna hi chhan hrang hrang vangin zawhfel hun tur a ruahmanah zawh a lo ni tawh lo thin a, tun dinhmun a ruahmanna siam danah chuan March, 2023-ah zawh tum a nih thu a sawi a ni.

He Rel kawng siam hna thawktu North East Frontier Railway hotute chuan Rel kawng laihin a paltlang tur ram neitute nena harsatna an tawhte chinfel chhung a rei avanga hnathawh tan lawk theih a nih loh avangte leh Fur ruahtui tam avanga hnathawhna hun (working season) a tlem avangin hnathawh a chak thei lo tih an lo sawi tawh thin a ni.

He Rel kawng siam hna hi zawhfel a nih hunah chuan Passenger phur Rel chu darkar khat-a KM 100 a chakin a tlan thei dawn a, bungraw phur chu darkar khatah KM 65-a chakin a tlan thei thung ang.

He Rel kawng siam mekah hian Lei lian siam tur (Major Bridges) 87 awmin hnathawh tur zaa 36.2 zawhfel a ni tawh a, Lei tenau siam turah zaa 70.9 zawhfel ni tawhin Lei sang (Tall Bridges) 6 a awm dawn bawk a ni. Tunah hian Earthwork thawh ngai ah zaa 85.9 zawhfel ni tawhin Leiverh Tunnel (excavation)-ah 88.1% zawhfel a ni tawh a, Tunnel (lining) pawh 74.6% zawh a ni tawh a, kawng chunga Lei awm tur Road Over Bridge 40% leh Road under bridge  37.5% zawh a ni tawh bawk.

Ruahman lawk ang chuan Hortoki, Kawn-pui, Mualkhang leh Sairang-ah Rel Station a awm anga, 25% zawhfel a ni tawh bawk a ni.

Comments

Popular News (Last 30 Days)