Mizoram-ah COVID-19 hri kai 3 hmuh leh an ni

Niminpiah khan Mizoram-ah Sample 973 enfiah niin heng atang hian COVID-19 hri kai mi pathum hmuh belh leh an ni.

Sawrkar thuchhuah tarlan danin niminpiah-a Sample enfiah atanga hri kai hmuhchhuah te hi Rapid Antigen Test hmanga Sample enfiah 852 te atanga hri kai hmuh te vek an ni a, Lawngtlai District-ah mi pahnih leh Saitual District-ah mi pakhat niin Saitual District ami hi tunhnaia State pawn atanga rawn haw a ni a, Lawngtlai District-a hri kai pakhat hi Hostel-a awm tur enfiah atanga hri kai tih hriat niin pakhat zawk hi Hostel-a awm, tunhnaia hri kai hmuhchhuah nen inkawmhnaihna an neih avanga hri kai a ni bawk.

Niminpiah khan ZMC Laboratory-ah Sample 93 enfiah niin hri kai hmuhchhuah an awm lova, District hrang hranga TrueNat Laboratory-ah Sample 28 enfiah niin hri kai hmuhchhuah an awmlo bawk a ni.

Nimin khan Mizoram-a hri kai mi 3 te chu hri lakah fihlimin anmahni enkawlna hmun atanga chhuahtir an ni ve leh a, heti hian nimin tlai dar 5:00 thleng khan Mizoram-a hri kai hmuhchhuah chu 4399 niin an zinga 4372 te chu enkawl dam an ni tawh a, tunah hian hri kai enkawllai 17 la awmin hri kai hmuhchhuah atanga za zela 99.38 te chu enkawl dam an ni tawh a, hri kai zingah nunna chan mi 10 an awm tawh bawk a ni.

India ramah nimin thleng khan COVID-19 hri kai hmuhchhuah chu 1,09,50,201 an tling tawh a, darkar 24 kalta chhungin hri kai 12,881 hmuh belh leh an ni a, nimin thleng khan India rama hri kai zingah mi 1,06,56,845 te chu enkawl dam ni tawhin hri kai hmuhchhuah atanga za zela 97.32 te chu enkawl dam an ni tawh a, tunah hian hri kai enkawllai 1,37,342 la awmin nunna chan 1,56,014 an awm tawh bawk a ni.