Lunglei HPC Vice Chairman-in Lungsen-ah Turmeric Processing Plant a hawng

Horticulture Department leh RD Department-te hmalaknaa buatsaih, Lungsen khuaa Aieng sawngbawlna hmunpui, 'Lungsen Turmeric Processing Plant' chu nimin khan HPC Vice Chairman, Lawmawma Tochhawng chuan a hawng.

'Lungsen Turmeric Processing Plant' hawnna hunah hian HPC Vice Chairman chuan hmasawnna daih rei kan neihna tur leh ram leh hnam hmasawn zelna turin ei leh bara kan intodelh a pawimawh hmasa ber tih sawiin, “HPC Lunglei pawhin ei leh bar-a kan intodelh theihna turin theihtawp a chhuah zel dawn a, kan kutkawih ngeia kan thar leh siam chhuah, project tha leh tlo kalpuia mipui tam zawkte tana eizawnna ngelnghet siam sak hi kan tum ber a ni,” a ti bawk.

Lungsen leh a chhehvela kuthnathawktute Aieng tharchhuah tangkai taka hman a nih theih nan kum 2014 khan DRDA Lunglei leh BDO Lungsen chuan BADP hnuaiah Aieng herna khawl leiin, a In tur pawh kum 2015-16 khan cheng nuai 5 sengin sak a ni a. HPC Vice Chairman kaihhruaiin nikum 2020 khan heng hmalakna lo awmsa te hi HPC Lunglei leh Horticulture Department tangkawp chuan a chhunzawm hna an thawk a. Nikum November thla khan Reiek Turmeric Grower Society hruaitute nen he khawl remkhawm hna hi thawkin, Lungsen Village Council leh tlawmngai pawl bakah Lungsen Aieng Farming Co-operative Society Ltd. Member te nen hma la ho in tunah chuan Aieng her theihin peihfel a ni leh ta a ni.

Lungsen Aieng Processing Unit-a Aieng herna khawl hi 18HP a chak, Pilot India, Kerala siam HM15 Hammer Mill a ni a. Darkar 1-ah Aieng dip Quintal 1 her theiin, ni 1-ah Quintal 8 atanga 10 pawh a her thei a ni. Aieng hring quintal 5 - 6 atang hian Aieng dip quintal khat a herchhuah theih a ni. Aieng herchhuah te hi Chemical tel lo a chin leh sawngbawl niin Aieng hi a rih zawng a zirin pocket 4-ah siam a ni a, gram 50 chu Rs. 20/- a hralh tur niin gram 300 chu Rs. 90/- man a ni dawn thung a ni.

Lungsen Aieng Farming Co-Operative Society Ltd. hi kum 2012-ah din niin tun dinhmun ah member 19 an awm mek a, Horticulture Department chuan Mission for Integrated Development of Horticulture (MIDH) hnuaiah Aieng chingtute mamawh khawl leh bungrua chi hrang hrang an ngaihtuah sak bawk a ni.