Latest News

MSU hruaitu ten Hailakandi DC hnenah thlen

Mizo Students' Union (MSU) Joint Hqrs. Silchar hruaitute chuan nimin khan Hailakandi DC, Megh Nidhi Dahal chu a Pisa-ah hmuin Zophai-a ramri buai leh hemi avanga Gharmura Mission Compound-a Mizo Missionary-te tawrhna chungchang an sawipui.

MSU hruaitute hian Hailakandi DC hnenah hian Assam Chief Minister hnena thleng tur lehkha thehlutin, he an lehkha thehluhah hian Gharmura Mission Compound-a cheng Mizo Missionary-te harsatna tawh chu pawi an tih thu te, chhiat tâwk chhungkuate chu Assam sawrkarin zángnadawmna an pek an phût thu te, pawikhawihtu misualte man an niha na taka hrem an phût thu te an tarlang a. Gharmura-a Presbyterian Mission School chu Gharmura leh a chhehvel mipuite tana a tangkai zia leh khawtual pawhin an thlâwp an beisei laia an chunga chhiatna a thleng ta mai chu lungchhiatthlak an tih thu tarlangin, he buaina thlen chhan nia lang Zophai ramri buai chu chingfel thuai tura Mizoram sawrkar leh Assam sawrkar an phût thu an tarlang bawk.

Hailakandi DC, Megh Nidhi Dahal chuan Gharmura-a Mizo Missionary te tawrhna chu pawi a tih thu leh khawiah pawh mi fel tak tak an awm laiin misual pawh an awm thin tih sawiin, Gharmura khawtlang mipui nawlpui chuan Mission School an thlâwp thu a sawi a. “He thil thleng hi ramri buai vang a ni a, ramri buai hi kan chinfel theiha State pahnihte kan inrem theih chuan heng buaina zawng zawng hi a reh thuai ka beisei,” a ti bawk.

Hailakandi DC chuan Gharmura-a thawk Mizo Missionary-te chu an hna zawm thuai tura a duh thu leh an lo kal hunah pawh sawrkarin venhimna tha tak a pek tur thu a sawi bawk a ni.

Comments

Chhiar Hlawhte