Lalduhoma’n ZPM zawm thar 306 a lawmlut

ZPM Leader, Lalduhoma chuan nimin khan Champhai-ah ZPM zawm thar mi 306 lawmlutin, eiruk sum ni lo, hmangaihna sum tlingkhawm in Serchhip Bial bye-election hmachhawn tur a nih thu a sawi.

Nimin-a Champhai Press Club-a mithar lawmluhna hun a hmanpuina ah he thu hi sawiin ZPM Leader, Lalduhoma chuan Opposition Party ni chunga mi heti zatin Zoram hmun hrang hrang a ZPM an zawm chu lawmawm a tih thu a sawi a. Tun dinhmunah party dang te aia an danglamna lian tak chu an phur a, phurna hian taihmakna a hring a, an thawkrim em em a, hei hian party dang ten an beihna pawh a tisang tih a sawi a. Ram siamtha tur chuan politics ringawt a tawk zo lo tih sawiin, “Pathian tello chuan kan ram hi kan ti dam zo lovang,” a ti bawk.

He hunah hian Champhai District ZPM chuan Lalduhoma hi a thla hualna atana pawisafai Rs 35,000/- an hlan a, hemi chungchangah hian Lalduhoma chuan lawmthu sawiin, eiruk sum ni lo, hmangaihna sum tlingkhawmin Serchhip Bial bye-election hmachhawn tur a nih thu a sawi bawk. ZPM thuchhuah in a tarlan danin nimin-a ZPM zawm thar an lawmluh te hi MNF atangin mi 25, Congress atangin mi 135, PRISM atangin mi 29 leh Neutral mi 117 an ni a. Champhai District PRISM hruaitute a bo bang awm lovin lawmluh vek an ni bawk.