Latest News

Khawnvartui sem dan enfiah a tul

Khawnvartui sem dan enfiah a tul

Tunhnaiah Serchhip-a mipuite hnena sem tur Khawnvartui rawn phurh chu a thleng tur a thleng kimlo nia hriat a nih avangin kan sawrkar hotuten an enfiah a, Khawnvartui hi a tira phurhchhuah atangin engemaw zat chu kawnglak-ah hralh a ni ngei niin a lang a. Amaherawh chu Khawnvartui rawn phurtu lirthei khalhtu chuan sawrkar hotu lian lam thu hmu-a hralh nia insawiin, a hralhna sum pawh a hlan niin a sawi a. Hetihlai hian kan sawrkar hotute lam chuan hetianga Driver in a sawi hi thu diklo a nih thu an sawi ve thung a. Hemi chungchangah hi chuan thudik chu harsa lo taka hriat theih a nih a rinawm a, thuneitute pawhin chhuichhuakin hma la zui ngei se a duhawm hle a ni.

Tun tuma Khawnvartui chungchang han chhui hian Ration khawnvartui kan sem dan phung ah hian enfiah ngai leh siamthat ngai a awm ngei niin a lang a. Khawnvartui Dealer ten an dawn tur zat an hre mumal miahlo nia lang te, Ration Card engzat nge an chan tih pawh hre lova Ration Card keng apiangte Khawnvartui pe tura an in ngai ngawt te hi kan kalphung-ah thil fello lian tak a awm vang niin a ngaih theih a, thuneitute pawhin heng te hi enfiahin kan kaldan phung hi siamtha ngei se a duhawm hle a ni.

Mizoram hian Oil laihchhuah leh thar-chhuah kan la neih loh avangin kan Oil zawng zawngte hi State pawn atanga kan lakluh vek a ni a. Tun tuma he Driver in a sawi anga Khawnvartui te hi hralh mai theih a nih chuan kan rama Oil pawlhdal awm thin te nen pawh hian thil inzawm thei tak a nih avangin kan sawrkar lam hotute pawh hian hemi chung-chang hi uluk zawka an enzui pawh a tul ngei dawn niin a lang a ni.

Comments

Chhiar Hlawhte