Latest News

Chachin thar thenkhat :

Science Centre hmalakna thlir

Kum 6 kalta, kum 2015-2021 chhunga Mizo-ram Science Centre hmalakna hrang hrangte chu nimin khan Chief Scientific Officer, Dr. R.K. Lallianthanga hovin a Office-ah thlirho a ni a. He huna tarlan a nih danin Mizoram Science Centre hi July ni 26, 2003-ah hawn a ni a, March ni 2, 2017-ah Autonomous Government Institution-ah Mizoram sawrkarin a dah a, kum 2015 khan thawktu nghet 5 leh nghet lo 7, an vaiin 12 an nih laiin tunah hian thawktu nghet 20 leh thawktu nghet lo 4, a vaiin 24 an awm mek a ni. Tunah hian Lunglei Science Centre & Digital Planetarium din mek a nih a ni a. Hei bakah hian Science Centre in an ngen angin Indian Air Force chuan TTLE Airframe model HPT-32 an rawn thawn tawh a, hei hi a hma thei ang bera phochhuah tura hmalak mek a ni.


In register turin hriattir

Sawrkar chuan thuchhuah siamin The Mizo-ram Registration of Tourist Trade Act, 2020 hnuaia Tourism Trade hrang hrang (Hotel/Restaurant/Tour Operators/Travel Agents etc.) kalpui/neitu zawng zawng te chu Tourism Department hnuaiah in register vek tura hriattir leh ngen an ni tih a tarlang a. Tourism Department hnuaia Tourism Service Providers in register turte tan Tourism Department chuan COVID-19 in a nghawng hrang hrang avanga harsatna thleng chhawk zangkhaitu atan registration fee 75% ngaihhnathiamna a pe dawn tih a tarlang bawk.


Hmalak dan tur sawihona nei

Lok Sabha MP, C. Lalrosanga’n Saansad Adarsh Gram Yojana (SAGY) Phase-IV hnuaia Model Village tura a thlan te zing ami, Muallung-thu khua hmasawnna tura ruahmanna kalpui dan tur chungchang chu nimin khan Aizawl DRDA Conference Hall-ah District Bawrhsap, Lalram-nghaka hovin sawiho a ni a, Working Group in khawtlang hruaitute nena inrawn-a an ngaih pawimawh point 29 an chhawpchhuah te chu he hunah hian tih hlawhtlin dan tur sawiho a ni.


ZPM in lawmthu sawina nei

ZPM Party chuan AMC inthlanpui neih zawh taka Lawmthu sawina Inkhawm chu nimin khan Aizawl-a ZPM Conference Hall-ah an nei a, he hunah hian ZPM Leader, Lalduhoma chuan kum 136-a upa Indian National Congress leh kum 60-a upa MNF, rorel lai, term chanve pawh la hmang zo lo, Party dangten an puih bawk leh, anni kum 3 chauha upa an inkhing tih sawiin, an result chu lawmawm a tih thu a sawi a, “General Election lo awm turah chuan MNF Vrs ZPM a ni dawn tih a chiang reng a ni,” a ti bawk.


AMC ruangam tur tifel

Aizawl Municipal Corporation (AMC) inthlanna neih zawh a nih hnuah MNF Party chu sawrkar siam tura inbuatsaih mekin nimin khan an Party Sr. Vice President, Tawnluia hovin Councillor thlanthar te leh Appointed Councillor te chuan thutkhawm an nei a, sawrkar thar din dan tur ruahmanin Mayor atan Lalrinenga Sailo chu ruat niin Deputy Mayor atan R. Thanglura bakah Executive Councillors atan Lalringliana, Laltlanzova Khiangte, B. Lalawmpuii leh H. Zonunsanga te ruat an ni bawk.

Comments

Popular News (Last 30 Days)