Latest News

Hri kaichhawnna hriatloh 3 hmuhchhuah leh an ni

Niminpiah-a Mizoram-a Sample enfiah 1134 atangin COVID-19 hri kai mi pathum hmuh leh an ni a, an vai hian hri kaina hriatloh leh chhuizui mek an ni.

Niminpiah a hria kai hmuhchhuah pathum zinga pahnih te hi Rapid Antigen Test hmanga Sample enfiah 945 atanga hri kai hmuh te niin Aizawl Bungkawn mi pakhat leh Lawngtlai-a mi pakhat an ni a, Aizawl ami hi nau nei tur damdawi In-a enfiah atanga hri kai tih hmuhchhuah niin Lawngtlai mi hi Hostel luh dawn avanga Sample enfiah atanga hri kai hmuhchhuah a ni.

Niminpiah a hri kai hmuhchhuah pakhat hi TrueNat Laboratory-a Sample enfiah 86 zinga hri kai hmuhchhuah niin Champhai District-a hmuhchhuah a ni a, Hostel-a luh dawn avanga Sample enfiah te atanga hri kai hmuhchhuah a ni bawk. Niminpiah khan ZMC Laboratory-ah Sample 103 enfiah niin hri kai hmuhchhuah erawh an awmlo thung.

Nimin khan Mizoram-a hri kai enkawl mi pakhat chu hri lakah fihlimin anmahni enkawlna hmun atanga chhuahtir a ni ve leh a, heti hian nimin tlai dar 5:00 thleng khan Mizoram-ah hri kai hmuhchhuah chu 4395 niin an zinga 4368 te chu enkawl dam an ni tawh a, hri kai zingah za zela 99.38 te chu enkawl dam ni tawhin tunah hian hri kai enkawllai 17 an la awm a, hri kai zingah nunna chan mi 10 an awm tawh bawk a ni.

Comments

Chhiar Hlawhte