Hri kai pung leh hret; 99% aia tam an dam tawh

Mizoram-ah ni 2 chhungin COVID-19 hri kai mi 9 lai hmuh belh leh an ni a, an zinga a tam zawk hi hri kaina hriatloh an ni.

Zirtawpni khan Mizoram-ah sample 734 enfiah niin COVID-19 hri kai mi pathum hmuh an ni a, ZMC Laboratory-ah Sample 123 enfiah niin hri kai hmuh an awm lova, District hrang hranga Truenat Laboratory-ah te Sample 120 enfiah niin heng atang hian Lunglei District-ah COVID-19 hri kai pakhat hmuhchhuah niin hri kai hmuhchhuah hi Hnahthial District atanga hri kai hmuhchhuah niin Sadguru Constructions Pvt. Ltd. hnuaia hnathawk tura tunhnaia State pawn atanga rawn kal a ni. Rapid Antigen Test hmangin Mizoram-ah Sample 491 enfiah niin heng atang hian COVID-19 hri kai mi 2 hmuh an ni bawk a, heng hri kai hmuhchhuah te hi Edenthar Veng-a khawsa nupa an ni a, an nu damlohna avanga damdawi In-a inentir tura kal niin hetah hian hri an kai tih hmuhchhuah a ni a, hri an kaina hriat a ni lo thung.

Inrinni khan Mizoram-ah sample 1208 enfiah niin hri kai mi 6 hmuh leh an ni a, heng hri kai hmuhchhuah te hi Rapid Antigen Test hmanga Sample enfiah 870 atanga hmuhchhuah vek niin Aizawl Ramhlun North-ah hri kai 4 hmuh an ni a, chhungkaw pakhat-a khawsa niin an zinga pakhat damlo inentir atanga hri kai tih hriatchhuah niin hri an kaina hriat a ni lo. Hei bakah hian Zuangtui-ah hri kai pakhat hmuh niin hri a kaina hriat a ni lo bawk a, Vairengte-ah hri kai pakhat hmuh ni bawkin tunhnaia Assam State-a kal a ni thung. Inrinni khan ZMC Laboratory-ah Sample 283 enfiah niin TrueNat Laboratory-ah Sample 55 enfiah a ni bawk a, heng ah hian hri kai hmuhchhuah an awmlo thung.

Hetihlai hian Inrinni khan Mizoram-ah COVID-19 hri kai mi 5 te chu enkawl dam niin anmahni enkawlna hmun atanga chhuahtir leh an ni a, nimin khan midang 7 te pawh hri lakah fihlimin chhuahtir leh an ni bawk a, heti hian nimin rlai dar 5:00 thleng khan Mizoram-ah COVID-19 hri kai hmuh tawh chu 4372 niin an zinga 4330 te chu enkawl dam an ni tawh a, hri kai hmuhchhuah atanga za zela 99.03 te chu enkawl dam ni tawhin tunah hian hri kai enkawllai 33 an la awm mek a, hri kai zingah nunna chan mi 9 an awm tawh bawk a ni.

India-ah COVID-19 hri kai enkawllai an tlem zel :

Nimin thleng khan India ramah COVID-19 hri kai hmuhchhuah chu 1,07,46,183 an tling tawh a, hri kai hmuhchhuah zinga 1,04,23,125 te chu enkawl dam ni tawhin hri kai hmuhchhuah atanga za zela 96.99 te chu enkawl dam an ni tawh a ni. Tunah hian hri kai enkawllai 1,68,784 la awmin hri kai zingah nunna chan 1,54,274 an awm tawh bawk. Darkar 24 kalta chhung khan mi 13,965 te chu enkawl dam leh an ni bawk.