Latest News

Chanchin thar thenkhat :

Governor-a ngenna sawifiah

Aizawl North-II bialtu MLA, Dr. Vanlalthlana chuan MNF MLA 2 nen Office of Profit avanga disqualify tura Congress Party member thenkhat in Governor hnena an ngen chungchang ah College leh MLA hlawh la kawp ang hiala an chhuah ta chu pawi a tih thu nimin khan Aizawl Press Club-ah thuthar thehdarhtute kawmin a sawi a, “College atanga Extra Ordinary Leave (EOL) ka lak loh avangin Speaker hriattirna nen thlap MLA hlawh ka la ta lova. MLA hlawh thar hi nikum kum tawp lamah khan ka College hlawh hian a pha ve chauh bawk,” a ti. Dr. Vanlalthlana chuan sum duhna avanga MLA tura ding a nih loh avangin, MLA in Electric bill, Tui bill, Internet bill, Phone bill leh Chanchinbu bill te chu a tir-a Tui bill vawi khat a lak ve bak a la ta lo tih sawiin, Class la ngai lo leh College pawh kalsan vang vang anga an puhna phei chu Defamation Case file-na tham a nih thu a sawi bawk.


Minister in IR Post a tlawh

Supply Minister leh bialtu MLA ni bawk, K. Lalrinliana chuan nimin khan Zophai-a IR Post tlawhin ramri tih hmasawn nana hmalak dan tur a endik bakah NH. 154 atanga Zophai IR duty post inkalpawhna tur metre 14.5 a thui, Minor Bridge sak mek chu a endik bawk a. Minister hian Mizoram mi leh sa, leilet neituten thlamuang taka an leilet an enkawl chhunzawm zel theih nan Patrolling uar lehzual a kalpui turaa  chah bakah an mamawh zual leina tur a pe bawk.


Vote thlak tha dawn

Mizoram State Election Commission chuan  Darlawn Venghlun Village Council, 2020 inthlanna neih chu mipui ten Vote thlak tha leh turin rua-hmanna a siam a, hemi ang hian Feb. 5, 2021 zing dar 7:00 atanga tlai dar 4:00 inkarah Vote hi thlak that a ni dawn a, he inthlanna a Vote tla te hi Vote thlak zawhfel veleh chhiar nghal tur a ni ang. He inthlanna neih tur avang hian Darlawn Venghlun Village Council huamchungah Model Code of Conduct puan nghal a ni bawk.


Bank hmalakna thlirlet

Nimin khan Mamit-ah District Bawrhsap, Dr. Lalrozama IAS hovin an District chhunga Bank te hmalak dan thlirin DCC/DLRC/DLSC thutkhawm neih a ni a, Bank hrang hrangte CD ratio tarlan niin September 2020 Quarters-ah CD Ratio 60% tur chu 48.96% a ni a, PMEGP hnuaiah Sept. thla thlengin Loan pek a awmlo bawk.


APYE Online India neih a ni

Asia Pacific Youth Exchange (APYE) Online India 2021 chu niminpiah khan neih tan niin a tum khatna atan India ramah neih niin Mizoram chuan he Programme hi a thleng a, chawlhkar hnih chhung awh tur he hunah hian Asia Pacific ram 22 atangin thalai 200 tel tura beisei niin Programme hrang hrang hman a ni ang.

Comments

Popular News (Last 30 Days)