Latest News

Health Minister in PHC pahnih te a tlawh

Health Department changtu Minister, Dr. R. Lalthangliana chuan Inrinni khan West Phaileng Primary Health Sub-Centre chu a hmunah a tlawh.

Health Minister hi West Phaileng PHC-a Medical Officer leh khawtlang hruaituten lo dawngsawngin West Phaileng PHC tih changtlun dan tur a en bakah Doctor leh Nurse Quarters hmunhmate a en bawk a. Thawktuten Lab. Technician an mamawh thu an sawi chu Financial Year thar nghah lawk a ngaih thu leh, chumi hnu lama tihfel sak theih an nih tur thu a sawi a. Minister hian a tul a pianga hman atan PHC-a thawktute chu Rs 10,000/- a pe a ni.

Hemi hnu hian LESDE (Labour Employment Skill Development Entrepreneuship) Quarters leh Building 11 vel sak sa, chhawr tangkai zui loh chu tlawhin Minister chuan heng hmunhma leh In sak sa te hi tangkai taka hman a nih theihna turin Cabinet-ah thlen a tum thu a sawi a. West Phaileng Higher Secondary School pawh tlawh nghalin thawktuten a tul anga an lo hman atan Rs.10,000/- a pe a. Education Minister a nih laia West Phaileng Higher School School hi Lump-sum grant in aid-a an dahte zing a mi a nih thu sawiin, Budget Session zawh hnuah a tih hmasawn kawnga hmalak dan tur an ngaihtuah tur thu a sawi bawk.

Health Minister hian Lengpui PHC pawh Inrinni vek khan tlawh nghalin Health Services-a Director, Dr. H. Lalchungnunga leh thawktu dang ten an lo dawngsawng a, Minister chuan Lengpui PHC chu Airport hnaiha awm a nih avangin emergency thilah leh kawng hrang hrangah pawimawhna riau a nei a, hei vang hian kan ngaih pawimawh a tul a ni, a ti a. Lengpui PHC hmunhma hung (fencing) dan turte, tui dahkhawlna lian zawk ruahman dan turte, Doctor leh Nurse bakah Staff dangte Quarters sak dan turte pawh an en ho nghal bawk a ni.

Comments

Chhiar Hlawhte