Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

H&TE Minister in Lengpui-a NIT Mizoram hmun tur tlawhin an dinhmun a enfiah

Higher and Technical Minister, Dr. R. Lalthangliana chuan Inrinni khan National Institute of Technology (NIT) Mizoram Campus, Lengpui-a buatsaih mek chu a hmunah kalin a enfiah.

NIT hmun tlawhtu Minister hi NIT Director, Prof. Rajat Gupta leh Registrar, Dr. Lalthanchami Sailo leh thawktu dangten an lo dawngsawng a, NIT Registrar chuan NIT Mizoram mamawh hmasa chu Campus ngelnghet Lengpui-a din fel vat a nih thu Minster hi a hrilh a ni. NIT Mizoram hotute sawi danin Lengpui-a NIT hmun atan hian ram acre 150 pek an ni a, kum 2014 atang khan cheibawl tanin tunah hian Campus chhunga inkalpawhna kawng leh Street Light bakah Campus ram hung (fencing) an zawh tawh thu an lo sawi a, Forest Clearance a awm loh avangin kum 2018 atang khan khawih chhunzawm theih a ni tawh lo a ni. NIT sak chhunzawmna tur cheng vbc. 669 chu sawrkar laipuiin a sanction vek tawh avangin Forest Clearance a awm veleh chak taka hma an lak nghal theih dawn thu an lo sawi bawk. 

H&TE Minister Dr. R. Lalthangliana chuan, NIT Mizoram chu Mizoram rohlu a nih avangin dinhmun chhe taka a awm a rem lo a, an harsatna tawhte sutkian sak turin State sawrkarin theihtawp a chhuah zel dawn tih a sawi a. Kum 10 lai mai NIT Mizoram chu baihvai takin an lo kal tawh a, thawktute thahnemngaihna azarah Temporary Campus chu Aizawl-ah mi in hmun hrang hrang luah chungin an kalpui a, NIT hi Act of Parliament-in ‘Institute of National Importance’ ah a puan tawh avangin Mizoram sawrkar chuan rang taka tihpuitlin a nih theih nan theihtawp chhuahin a tul ang ang bawhzui turin hmalak an tum a sawi bawk.

NIT Mizoram hi kum 2010 atangin Chaltlang, Aizawl-ah mimal building luah hawhin bul tan a ni a, tunah hian Academic Department paruk (6) a awm mek a. H&TE Minister hi  MYC Chairman Dr. Vanlaltanpuia, MLA leh Chief Secretary , Lalnunmawia Chuaungo bakah sawrkar mi pawimawh ten an tawiawm a ni.

Comments

Chhiar Hlawhte