Health & Family Welfare Minister, Dr. R. Lalthangliana chuan Inrinni zing khan Kanhmun-a COVID-19 Screening Point chu tlawhin thawktute leh VLTF hruaitute nen inkawmna an nei.
Kanhmun-a COVID-19 Screening Point a tlawhna ah hian Health Minister chuan Kanhmun Screening Point-ah hian chawhrualin nitin mi 80 atanga 100 inkar an screen reng thin a, COVID-19 laka Mizoram him nan helai hmun hi a pawimawh em avangin emergency in a rem dan ang anga Screening Point hi hnawhsarum taka buatsaih a ni tih a sawi a. COVID-19 hripui hian engtik ah nge min kiansan dawn a hriat rih si lova, engemawchen chu Screening Point la dah a ngaih hmel avangin changtlung deuh zawka siam a tul thu sawiin, thawktu tenan mamawh an thlen te chu a rang thei ang bera bawhzui nghal a nih tur thu a sawi bawk.
Minister hian Zawlnuam Primary Health Centre leh Kawrthah Community Health Centre pawh tlawhin an dinhmunte leh an mamawhte a zirchiang nghal bawk a, hmalak theih nghal chi te chu a tul ang anga bawhzui a nih tur thu a sawi a ni.
Health Minister Dr. R. Lalthangliana hian Zirtawpni leh Inrinni khan Zampui tlangdung-a Zofate chenna khaw hrang hrang 11 - Zomuan-tlang, Phuldungsei, Sabual, Tlangsang, Banglazion, Behliangchhip, Vanghmun, Tlaksih, Hmunpui, Hmawngchuan leh Vaisam a tlawhchhuak vek a, heng khaw hrang hrangah hian khawtlang hruaitute nen inkawmin Minister chuan Zampui Tlangdung-a Zofate chu kan unaute an nih avangin Mizoram sawrkar hian a enhrang dawn lo che u a, a thlahthlam dawn lo che u a ni, a ti a. Khawvel ramri khamin min thenhrang mahse kan thinlunga kan inunauna leh kan inlaichinna hi engmahin a tichhhe thiang lova, kan tu leh fa, chhuan lo la kal tur zelte thlengin kan sawhngheh sauh sauh a tul a ni, a ti a, Mizo hnam a dinchhuah-a a than duah hluah hluahna tur chuan khawvel hmun hrang hranga Zofate hi kan tanrual reng a ngai a ni, a ti bawk.
Comments
Post a Comment