NITI Aayog Governing Council Meeting-ah Chief Minister in Mizoram mamawh a thlen

NITI Aayog Governing Council Meeting vawi 6-na chu Inrinni nileng khan Virtual-a neih a ni a, he hunah hian State leh Union Territory zawng zawng-a Chief Minister leh Lt. Governor te telin Mizoram atangin Chief Minister, Zoramthanga pawh telin Mizoram mamawh hrang hrangte a thlen a ni.

He Meeting-ah hian Chief Minister, Zoramthanga chuan Mizoram hmalakna leh mamawhte a sawi zingah Centrally Sponsored Scheme (CSS) leh Central Sector Scheme hnuaia sum hmuh te chu sawrkar laipui leh State sawrkar sum insem dan chu State harsa zawkte tan phurrit a nih theih thin avangin ngaihtuah nawn leh nise a ti a. Oil Palm chingtute harsatna tarlangin, Company ten an kharchhawn sakna rate hniam lutuk chu ennawn theih nise a ti a. Tlangram Lo neih atanga lo hmun nghet neia inthlak chungchanga NITI Aayog hnuaia Working Group pakhatin report a lo siam tawh zulzuiin Mizoram-a tlangram lo neih bansan a, Lo hmun nghet neia eizawnna inlet tura hmalakna atan sawrkar laipui puihna mamawh a nih dan te sawi bawk.

Chief Minister chuan mipui in hriselna tha zawk an neih theih nan thingtlang hmun hla zawk tam taka Sub-Centre mamawhna a nasat zia leh chumi atan chuan hmalak sak turin Prime Minister chu a ngen a. NHM hnuaia sum hmuhah indaihlohna a awm thu te, IDSP thuamthat a pawimawh thu leh ZMC chu Regional Medical College a hlankai a nih theih nan hma lak sak turin a thlen bawk.

Digital Connectivity a la thatloh thu pawh he hunah hian Chief Minister chuan thlenin, sawrkar laipui hmalakna kal mek Bharat Net chu Mizoram-a kalpui thuai turin a thlen a. Act East Policy chungchangah hmalak thuai a pawimawh thu a tarlang bawk a. Mizoram chhunga sumdawnna din thar a kalpui duhte tan kalphung awlsam leh khirh khan lo zawk siama hmalak mek a nih dan te tarlangin, sumdawnna kawngpui pawimawh tur Kaladan Multi Modal Transit Transport Project chu Myanmar lamin an ram chhunga Zorinpui atanga Paletwa inkar kawng siam tur an la thawh ve loh thu leh, hemi chungchangah hian Prime Minister chu hmalak sak turin a sawm a. Bamboo Development atana mamawhna leh a bik takin Bamboo Link Road atana sum mamawhna te a thlen bawk.

Tun tuma NITI Aayog Governing Council Meeting-a thu ngaihtuah tura chhawpchhuah zingah India ram chu thil siamchhuahna hmunpui a siam te, Agriculture kalphung sawi danglam a tihhmasawn te, mihring thiamna leh theihna tihhmasawn te, hriselna chungchang leh hmasawnna rualkhai zawk neih na tura Grassroot Level-a Service Delivery tihhmasawn te a tel a. Chief Minister hi Chief Secretary, Addl. Chief Secretary leh Planning Department-a Commissioner & Secretary ten an tawiawm a ni.